មជ្ឈមណ្ឌលកំណត់គោលដៅហិរញ្ញប្បទានភេរវកម្ម (TFTC) ដែលរួមមានសហរដ្ឋអាមេរិក បារ៉ែន គូវ៉ែត អូម៉ង់ កាតា អារ៉ាប៊ីសាអ៊ូឌីត និងអេមីរ៉ាត​អារ៉ាប់រួម កាលពីថ្ងៃអង្គារ (ទី៣០ ខែមិថុនា ឆ្នាំ២០២៦) បានប្រកាសដាក់ទណ្ឌកម្មស្រប​គ្នា​ លើស្ថាប័ន​ Al-Qard Al-Hassan, Bayt al-Mal និងមន្ត្រីជាន់ខ្ពស់មួយចំនួនរបស់ក្រុម​ហេសបូឡា​។

ក្រសួងរតនាគារបានឲ្យ​ដឹង​នៅក្នុងសេចក្តីថ្លែងការណ៍មួយអំពីចំណាត់​ការ​នេះថា អង្គភាពចំនួន ៥ និងបុគ្គល ១៦​នាក់ ត្រូវបានដាក់ទណ្ឌកម្ម។

សេចក្តីថ្លែងការណ៍ដែលធ្វើឡើងដោយក្រសួងរតនាគារ បានរៀប​រាប់​ថា៖ «បណ្តាញដែលកំណត់ដោយ TFTC នៅថ្ងៃនេះ គំរាមកំហែងដល់ស្ថិរភាពក្នុងតំបន់ សន្តិសុខអន្តរជាតិ ផលប្រយោជន៍ទៅវិញទៅមក និងពាណិជ្ជកម្មសកល។ តាមរយៈការរឹតបន្តឹង​ការទទួលបានមូលនិធិរបស់ក្រុម​ហេសបូឡា សមាជិក TFTC កំពុងធ្វើការ ដើម្បីការពារសុចរិតភាពនៃប្រព័ន្ធហិរញ្ញវត្ថុអន្តរជាតិ គាំទ្រប្រជាជនលីបង់ និងប្រឆាំងនឹងបណ្តាញភេរវកម្ម»។

TFTC ត្រូវបានធ្វើឡើងនៅឆ្នាំ២០១៧ ក្នុងអំឡុងពេលរដ្ឋ​បាល​ដំបូង​របស់​លោកប្រធានាធិបតី Donald Trump ហើយ​បញ្ជាក់ថា ខ្លួនមានគោលបំណង «ប្រឆាំងនឹងបណ្តាញហិរញ្ញប្បទានភេរវកម្ម ដោយកំណត់អត្តសញ្ញាណ តាមដាន និងចែករំលែកព័ត៌មាន អំពីបណ្តាញហិរញ្ញប្បទានភេរវកម្ម សម្របសម្រួលវិធានការ​រំខានរួមគ្នា ក្នុង​នោះ​រួមទាំងការ​ដាក់​ទណ្ឌកម្ម និងផ្តល់ជំនួយកសាងសមត្ថភាព ដើម្បីប្រឆាំងនឹងហិរញ្ញប្បទានភេរវកម្មផង​ដែរ​។

យោងតាមគេហទំព័ររបស់ស្ថាប័ននេះ បាន​ឲ្យ​ដឹង​ថា អារ៉ាប៊ីសាអ៊ូឌីត និងសហរដ្ឋអាមេរិក កាន់​តួនាទី​ជាសហប្រធានរបស់​ TFTC៕