នៅ​ថ្ងៃពុធ (ទី១ ខែកក្កដា ឆ្នាំ២០២៦) នេះ មន្ត្រី​បាន​ប្រាប់ឱ្យ​ដឹងថា ការស្លាប់ជាង ១.០០០នាក់ នៅអេស្ប៉ាញ ត្រូវបានសន្មតថា គឺ​ដោយសារ​រលកកម្ដៅ​ថ្មីៗនេះដែលបានធ្វើ​ឱ្យ​ទ្វីបអឺរ៉ុបក្ដៅ​ស្ទើរទ្រាំមិនបាន​​ ខណៈដែលប្រទេសនេះបានកត់ត្រារយៈពេល ៦ខែដំបូងដែលមាន​អាកាសធាតុ​ក្តៅខ្លាំង​បំផុតមិនធ្លាប់មាន​។

វិទ្យាស្ថានសុខភាព Carlos III បាន​បញ្ជាក់​ថា មនុស្សយ៉ាងហោចណាស់ ១.០២៨នាក់ បានបាត់បង់ជីវិត​ដោយសារបញ្ហាទាក់ទងនឹងកម្ដៅ ក្នុងអំឡុងពេលមាន​រលកកម្ដៅ​។ ហើយ​បើយោងតាមទីភ្នាក់ងារអាកាសធាតុជាតិ Aemet បាន​ឱ្យ​ដឹង​ថា តួលេខនេះគឺច្រើនជាងទ្វេដងនៃការស្លាប់ចំនួន ៤ឥ៧នាក់ ដែលត្រូវបានសន្មតជាប់​ទាក់ទង​នឹង​ ក្នុងខែមិថុនា ឆ្នាំ២០២៥ ជាខែមិថុនាដែលមាន​អាកាស​ក្តៅបំផុតរបស់​អេស្ប៉ាញ គិត​ចាប់តាំងពីការ​កត់​កំណត់ត្រាបានចាប់ផ្តើមឡើង​។

តាម​រយៈ​ការបង្ហោះ នៅលើបណ្ដាញ​សង្គម​ X នៅ​ថ្ងៃពុធនេះ ទីភ្នាក់ងារ Aemet បានឱ្យ​ដឹង​ថា រយៈពេល ៦ខែដំបូងនៃឆ្នាំ២០២៦ គឺជារយៈពេលក្តៅបំផុតនៅក្នុងប្រទេសអេស្ប៉ាញ គិត​ចាប់តាំងពីការចាប់ផ្តើមនៃកំណត់ត្រា ដោយមានសីតុណ្ហភាព ១,៦អង្សាសេ លើសពីកម្រិតធម្មតាជាមធ្យម។ ហើយ Aemet បានបន្ថែម​ថា ខែមិថុនា ឆ្នាំ២០២៦ បានក្លាយជាខែមិថុនាដែលក្តៅបំផុតទី២ «ដោយមានសីតុណ្ហភាពជាមធ្យម ៣,២អង្សាសេ លើសពីបទដ្ឋាន» ។

ក្រុមអ្នកវិទ្យាសាស្ត្ររបស់​ស្ថាប័ន World Weather Attribution បាន​ឲ្យ​ដឹង​ថា រលកកម្ដៅ​ដែលបានធ្វើ​ឱ្យ​តំបន់​អឺរ៉ុបក្ដៅ​ខ្លាំង ចាប់ពីចុងខែមិថុនា គឺជារលកកម្ដៅក្ដៅ​ខ្លាំង​បំផុតមិនធ្លាប់មាន នៅទ្វីបអឺរ៉ុប ហើយវានឹង «ស្ទើរ​តែ​មិនអាចកើតមាន​» ឡើយ​ នៅក្នុងខែមិថុនា ប្រសិបនបើ​មិនមែន​ដោយសារ​បម្រែបម្រួឡ​អាកាសធាតុនោះ​៕