អតីតមេបញ្ជាការកងទ័ពអ៊ីស្រាអែល និងជាមេដឹកនាំក្រុម​ប្រឆាំង លោក Gadi Eisenkot នៅ​ថ្ងៃពុធ (ទី​១ ខែកក្កដា ឆ្នាំ២០២៦)​ នេះ បានចោទប្រកាន់នាយករដ្ឋមន្ត្រី លោក​ Benjamin Netanyahu ថា ប្រឌិតការអះអាងពីការ​​មានអាវុធនុយក្លេអ៊ែររបស់អ៊ីរ៉ង់ ដើម្បីបំភ័យសាធារណជនអ៊ីស្រាអែល។

យោងតាមសារព័ត៌មាន​ចុះផ្សាយ​ប្រចាំថ្ងៃរបស់អ៊ីស្រាអែល Yedioth Ahronoth បាន​ឲ្យ​ដឹង​ថា លោក Eisenkot បានធ្វើការកត់សម្គាល់បែបនេះ នៅក្នុង​សន្និសីទមួយ នៅភាគ​កណ្តាលអ៊ីស្រាអែល ដោយបញ្ជាក់​ថា សេចក្តីថ្លែងការណ៍ថ្មីៗរបស់លោក Netanyahu ស្តីពីសមត្ថភាពនុយក្លេអ៊ែររបស់អ៊ីរ៉ង់ គឺជា​រឿង​មិនពិត។

លោក Eisenkot ដែលជាប្រធានគណបក្ស Yashar ផងដែរនោះ ត្រូវបានគេដកស្រង់សម្តី ដែល​បាននិយាយ​ថា៖ «លោក Netanyahu បាននិយាយរឿងគួរឱ្យស្អប់ខ្ពើម។ អ៊ីរ៉ង់មិនមានគ្រាប់បែកនុយក្លេអ៊ែរអ្វីទាំងអស់។ លោក​កំពុងប្រឌិតការពិត ដើម្បីបំភ័យសាធារណជនអ៊ីស្រាអែល»។

សារព័ត៌មាន​នេះបានបន្ថែម​ថា លោក Eisenkot កំពុងសំដៅទៅលើមតិយោបល់របស់លោក Netanyahu ដែល​បានធ្វើកាលពីថ្ងៃអង្គារ នៅក្នុងបទសម្ភាសន៍ជាមួយទូរទស្សន៍អ៊ីស្រាអែល Channel 14 ដោយ​នៅ​ពេល​នោះ​លោក​នាយករដ្ឋមន្ត្រីបានលើក​ឡើង​ថា៖ «ខ្ញុំបានឲ្យ​ចូល​ធ្វើ​ប្រតិបត្តិការ​ក្នុងប្រទេសអ៊ីរ៉ង់ ២ដងដើម្បីជួយសង្គ្រោះពួក​យើងឲ្យរួច​ពី​​ការបំផ្លិចបំផ្លាញដោយគ្រាប់បែកបរមាណូ ដេល​ពួកគេមាន​នៅក្នុង​ដៃ​រួចហើយ»។

លោក Eisenkot ដែលបានបម្រើការជានាយ​សេនាធិការយោធាអ៊ីស្រាអែល ពីឆ្នាំ២០១៥ ដល់ឆ្នាំ២០១៩ បានប្រកាសនៅថ្ងៃអង្គារថា លោកមានបំណងឈរឈ្មោះប្រជែង​តំណែង​នាយករដ្ឋមន្ត្រី៕