ប្រធានអ្នកចរចារបស់អ៊ីរ៉ង់ លោក Mohammad Bagher Ghalibaf កាលពីថ្ងៃអង្គារ (ទី​៣០ ខែមិថុនា ឆ្នាំ២០២៦) បាននិយាយថា ទីក្រុង​តេអេរ៉ង់មិនអាចនាំចេញប្រេងបាន​ឡើយសូម្បី ១បារ៉ែល ក្នុងអំឡុងពេលបិទខ្ទប់​ផ្លូវទឹក​ដោយ​សហរដ្ឋអាមេរិក ចំពោះ​កំពង់ផែរបស់​ប្រទេស​ ដោយកត់សម្គាល់ថា ការនាំចេញបានកើនឡើងចាប់តាំងពីពេលនោះមក។

លោក Ghalibaf បាននិយាយនៅក្នុងបទសម្ភាសន៍មួយតាម​ទូរទស្សន៍រដ្ឋថា៖ «ចាប់តាំងពីថ្ងៃដែលការបិទខ្ទប់​ផ្លូវត្រូវបានដក​ចេញ​ រហូតដល់ថ្ងៃនេះ យើងបាននាំចេញប្រេងជាង ៤០លានបារ៉ែល»។

លោកបានបន្ថែមថា «ផ្ទុយទៅវិញ ក្នុងរយៈពេល ៥០ ទៅជិត ៦០ថ្ងៃមុន យើងពិតជាមិនអាចនាំចេញប្រេងសូម្បីតែ ១បារ៉ែល»។

ជាមួយ​គ្នានេះ លោក Ghalibaf ក៏បានលើក​ឡើង​ផងដែរថា អ៊ីរ៉ង់កំពុងផ្តល់អាទិភាពដល់ការទូតជាមួយសហរដ្ឋអាមេរិក ប៉ុន្តែនៅតែត្រៀមខ្លួន សម្រាប់សង្គ្រាម។

ខណៈដែលគណៈប្រតិភូអ៊ីរ៉ង់ និងសហរដ្ឋអាមេរិក គ្រោង​ធ្វើ​ការពិភាក្សាដាច់ដោយឡែកពីគ្នា នៅទីក្រុងដូហា ប្រទេស​កាតា លោកបានសង្កត់​ធ្ងន់​ថា៖ «យើងកំពុងបន្តការសន្ទនា ប៉ុន្តែប្រសិនបើការសន្ទនាមិនត្រូវបានអនុវត្តទេ យើងក៏ត្រៀមខ្លួនសម្រាប់សង្គ្រាមដែរ ហើយនឹងឆ្លើយតបទៅតាម​អ្វី​ដែល​បាន​កើត​ឡើង»៕