ក្រសួងយុត្តិធម៌កូរ៉េខាងត្បូង បានឱ្យ​ដឹង​នៅថ្ងៃពុធ (ទី១ ខែកក្កដា ឆ្នាំ២០២៦) នេះ​ថា ខ្លួននឹងបន្តលើកលែងការ​បង់​ថ្លៃសុំទិដ្ឋាការ សម្រាប់អ្នកទេសចរជាក្រុមមកពី ៦ប្រទេស រហូតដល់ថ្ងៃទី៣១ ខែធ្នូ ជា​ចំណាត់ការ​មួយដែលមានគោលបំណងគាំទ្រដល់ការងើបឡើងវិញនៃវិស័យទេសចរណ៍ចូល​ប្រទេស​។

ការលើកលែងនេះអនុវត្តចំពោះអ្នកទេសចរជាក្រុមដែល​មកពីប្រទេសកម្ពុជា ចិន ឥណ្ឌា ឥណ្ឌូនេស៊ី ហ្វីលីពីន និងវៀតណាម។

គោលនយោបាយនេះ ដែលលើកលែងការ​បង់​ថ្លៃសុំទិដ្ឋាការចំនួន ១៥ដុល្លារអាមេរិក ត្រូវបានគ្រោងផុតកំណត់នៅចុងខែមិថុនា។ ក្រសួងបានបញ្ជាក់​ថា ខ្លួនបានសម្រេចពង្រីកវិធានការនេះ ដើម្បី «បន្តធ្វើឱ្យវិស័យទេសចរណ៍ជាក្រុមមានភាពរស់រវើកឡើងវិញ»។

ក្រសួងបានបន្ថែម​ថា តម្រូវការសម្រាប់ទិដ្ឋាការទេសចរណ៍ជាក្រុម បានកើនឡើង ជាពិសេសពីចិន និងបណ្ដាប្រទេស​តំបន់​អាស៊ីអាគ្នេយ៍។ ហើយ​យោងតាមទិន្នន័យរបស់ក្រសួង បាន​បង្ហាញ​ថា ភ្ញៀវទេសចរជាង ៧៩០.០០០នាក់ បានចូលទៅ​ប្រទេសកូរ៉េខាងត្បូង ដោយប្រើទិដ្ឋាការទេសចរណ៍ជាក្រុម ក្នុងឆ្នាំ២០២៥ ដោយ​កើនឡើង ៣៩ភាគរយ ពីឆ្នាំ២០២៤។

ទិន្នន័យ​បាន​ឲ្យ​ដឹង​ទៀត​ថា អ្នកទេសចរជាក្រុមមកពីចិន បានកើនឡើង ៤៨ភាគរយ ក្នុងរយៈ​ពេល​ដូចគ្នា ខណៈដែលភ្ញៀវទេសចរមកពីវៀតណាមបានកើនឡើង ៥ភាគរយ ហើយ​អ្នកទេសចរជាក្រុមមកពីឥណ្ឌា បាន​កើនឡើងភាគរយច្រើនបំផុត ដោយកើនឡើងទ្វេដងពី​ចំនួន ៥៧៣នាក់ ក្នុងឆ្នាំ២០២៤ ដល់ ១.១២០នាក់ ក្នុងឆ្នាំ២០២៥៕