លោក Gharibabadi អនុរដ្ឋមន្ត្រីការបរទេសអ៊ីរ៉ង់ បានច្រានចោលកិច្ចសន្ទនាសន្តិសុខប្រចាំតំបន់ដឹកនាំដោយសហរដ្ឋអាមេរិក ដែលបានធ្វើឡើងនៅប្រទេសបារ៉ែន ជាកន្លែងដែលអ្នកចូលរួមមកពី១២ ប្រទេសបានពិភាក្សាអំពីច្រកសមុទ្រ Hormuz។

លោកបានលើកឡើងថា «ច្រកសមុទ្រ Hormuz ត្រូវបានកំណត់នៅក្រោមបញ្ជាការរដ្ឋានរបស់អ៊ីរ៉ង់ ពុំមែនបញ្ជាការដ្ឋានកណ្តាលរបស់សហរដ្ឋអាមេរិកទេ» ហើយ កិច្ចប្រជុំកំពូលយោធានៅប្រទេសបារ៉ែន មិនអាចបង្កើតសណ្តាប់ធ្នាប់ និងសន្តិសុខស្របច្បាប់ សម្រាប់ឈូងសមុទ្រពែក្សបានទេ។

លោកបាននិយាយថា សន្តិសុខរបស់តំបន់នេះ នឹងត្រូវបានធានាតាមរយៈការបញ្ចប់អន្តរាគមន៍ និងការដកទ័ពរបស់សហរដ្ឋអាមេរិកចេញពីតំបន់នោះ ការគោរពដែនអធិបតេយ្យភាពរបស់ប្រទេសនានា និងការទទួលយកការពិតភូមិសាស្ត្រនយោបាយថ្មី ពុំមែនក្រោមឆ័ត្រយោធារបស់សហរដ្ឋអាមេរិកទេ។

ការថ្លែងរបស់លោក ធ្វើឡើងបន្ទាប់ពីសហរដ្ឋអាមេរិកបានប្រកាសថា មន្ត្រីយោធាជាន់ខ្ពស់មកពី១២ ប្រទេស រួមមានប្រទេសអារ៉ាប៊ីសាអ៊ូឌីត អារ៉ាប់រួម កាតា លីបង់ និងស៊ីរី បានជួបប្រជុំគ្នានៅប្រទេសបារ៉ែន និងបានបញ្ជាក់ពី «ការប្តេជ្ញាចិត្តរបស់ពួកគេ ចំពោះលំហូរពាណិជ្ជកម្មដោយសេរី» តាមរយៈច្រកសមុទ្រ Hormuz ។