ភ្នំពេញ៖ គណៈកម្មាធិការជាតិគ្រប់គ្រងគ្រោះមហន្តរាយ និងអង្គការភីពផលអ៊ីននីត នៅកម្ពុជា ហៅកាត់ថា អង្គការភីន បានចុះអនុស្សរណៈនៃការយោគយល់គ្នា ដើម្បីបន្តសុពលភាព នៃកិច្ចសហការជាមួយគ្នា សម្រាប់រយៈពេល៣ឆ្នាំបន្តទៀត ទៅលើប្រព័ន្ធប្រកាស​ឱ្យដឹង​មុន​១២៩៤។

ក្នុងពិធីចុះហត្ថលេខានៅគណៈកម្មាធិការជាតិគ្រប់គ្រងគ្រោះមហន្តរាយកាលពីរសៀលថ្ងៃទី ២៩មេសា រវាងឯកឧត្តម ហង្ស សាមឿន អនុប្រធានគណៈកម្មាធិការជាតិ​គ្រប់គ្រង​គ្រោះ​មហន្តរាយ និងជាទីប្រឹក្សាសម្តេចតេជោ ហ៊ុន សែន នាយករដ្ឋមន្ត្រី និងលោក លូកាស ឡូបេ នាយក​អង្គការភីនប្រចាំប្រទេសកម្ពុជា បានធ្វើឡើងក្នុងគោលបំណង ដើម្បីពង្រឹងទំនាក់ទំនង និងកិច្ចសហប្រតិបត្តិការឱ្យកាន់តែជិតស្និទ្ធ ជាមួយគ្នា សំដៅបន្តអនុវត្តប្រព័ន្ធប្រកាសឱ្យដឹងមុន ១២៩៤ ភាពធន់ទៅនឹងទឹកជំនន់ និងការឆ្លើយតប​សង្គ្រោះបន្ទាន់​ទៅ​នឹង​គ្រោះមហន្តរាយ​នៅ​ព្រះរាជាណាចក្រកម្ពុជា។ អនុស្សារណៈនេះ នឹងមានសុពលភាព សម្រាប់រយៈពេល៣ឆ្នាំបន្ត ដោយគិតចាប់ពីថ្ងៃ​ចុះហត្ថ​លេខា​នេះ​តទៅ។

ឯកឧត្តម ហង្ស សាមឿន ក្នុងនាមឯកឧត្តមទេសរដ្ឋមន្ត្រី គន់ គីម អនុប្រធានទី១ គណៈកម្មាធិការ​​ជាតិគ្រប់គ្រងគ្រោះមហន្តរាយ បានកោតសរសើរ និងវាយ​តម្លៃ​ខ្ពស់​ចំពោះ​អង្គការ​ភីពផលអ៊ីននីតនៅកម្ពុជា ដែលបានសហការយ៉ាងជិតស្និទ្ធជាមួយ គណៈកម្មាធិការ​ជាតិ​គ្រប់គ្រង​គ្រោះមហន្តរាយចាប់ពីឆ្នាំ២០១៤ រហូតដល់បច្ចុប្បន្ន ក្នុងនោះប្រព័ន្ធប្រកាសឱ្យដឹងមុន១២៩៤ ត្រូវបាន​ពង្រីកនៅទូទាំងប្រទេសនិងបានទទួលស្គាល់ថា ជារបស់គណៈកម្មាធិការ​ជាតិ​គ្រប់គ្រង​គ្រោះមហន្តរាយ។

ឯកឧត្តម ក៏បានជំរុញលើកទឹកចិត្តដល់អង្គការភីពផលអ៊ីននីតនៅកម្ពុជា ពង្រឹង និងពង្រីក​កិច្ច​សហប្រតិបត្តិការឱ្យកាន់តែសកម្មនិងជិតស្និទ្ធបន្ថែមទៀតជាមួយគណ:កម្មាធិការជាតិគ្រប់គ្រងគ្រោះមហន្តរាយ លើការរៀបចំផែនការសកម្មភាពសម្រាប់អនុវត្តគម្រោងពិគ្រោះយោបល់ សិក្ខាសាលាការបណ្តុះបណ្តាលនិងសកម្មភាពនានារួមគ្នា។ទន្ទឹមនេះ លោកនាយក​អង្គការ​ដៃគូ​ក៏​បានអរគុណដល់គណៈកម្មាធិការជាតិគ្រប់គ្រងគ្រោះមហន្តរាយដែលបានផ្តល់កិច្ចសហការសម្រប​សម្រួលធ្វើឱ្យរាល់គម្រោងរបស់អង្គការទទួលបានជោគជ័យ លើការផ្តល់បច្ចេកទេស បណ្តុះបណ្តាល បទពិសោធន៍ គ្របដណ្តប់បានទូទាំង២៥រាជធានី ខេត្តនៃប្រទេសកម្ពុជា៕ អត្ថបទ៖ មុត សុត