​អ៊ុយ​ក្រែ​ន៖ ប្រធានាធិបតី​អ៊ុយ​ក្រែ​ន​លោក Volodymyr Zelenskyy បាន​និយាយ​កាលពី​ថ្ងៃ​សុក្រ​ថា ស្ថានភាព​នៅ​ក្នុង​ទីក្រុង Kharkiv និង​នៅ​តំបន់ Donbas នៅតែ​ពិបាក​ខ្លាំង​។​ ​លោក Zelenskyy និយាយ​ថា ការ​ការពារ​ទឹកដី​របស់​យើង និង​ប្រជាជន​គឺជា​ការ​ប្រយុទ្ធ​ដើម្បី​ជីវិត​។ អ្នក​ឈ្លានពានកំពុង​ធ្វើ​អ្វី​គ្រប់យ៉ាង ​ដើម្បី​បំផ្លាញ​ជីវិត​របស់​យើង​នៅ​ក្នុង​ទឹកដី​តំបន់ Donbas​។​

​ការ​បាញ់​ផ្លោង​ដ៏​ឃោរឃៅ​ឥត​ឈប់ឈរ ការវាយប្រហារ​ឥត​ឈប់ឈរ​របស់​រុស្ស៊ី​មក​លើ​ហេដ្ឋារចនាសម្ព័ន្ធ និង​តំបន់​លំនៅឋាន​បញ្ជាក់​ថា ​រុស្ស៊ី​មានបំណង​ធ្វើ​ឱ្យ​ទឹកដី​នេះ​គ្មាន​មនុស្ស​រស់នៅ​។ ​កាលពី​ថ្ងៃ​ព្រហស្បតិ៍ កងកម្លាំង​របស់​ទីក្រុង​មូ​ស្គូ​បាន​បើក​ការវាយប្រហារ​ដោយ​មី​ស៊ី​ល ​ទៅលើ​អគារ​លំនៅឋាន​ខ្ពស់​មួយ​កន្លែង និង​អគារ​មួយ​កន្លែង​ផ្សេងទៀត​ក្នុង​ទីក្រុង Kyiv ដែល​មាន​ភាព​ស្ងប់ស្ងាត់​ជាច្រើន​សប្តាហ៍​កន្លងមក​នៅ​ក្នុង​រដ្ឋធានី ​បន្ទាប់ពី​ការ​ដក​ថយ​របស់​កង​ទ័ព​រុស្ស៊ី​ចេញពី​តំបន់​កាលពី​ដើមខែ​នេះ​។​

​ការវាយប្រហារ​ដោយ​មី​ស៊ី​ល​បាន​កើតឡើង​ត្រឹម​តែមួយ​ម៉ោង ​បន្ទាប់ពី​លោក Zelenskyy បាន​ធ្វើ​សន្និសីទ​សារព័ត៌មាន​រួម​ជាមួយ​អគ្គលេខាធិការ​អង្គការសហប្រជាជាតិ​លោក Antonio Guterres​។ ​លោក Zelenskyy និយាយ​ថា ការ​បោសសម្អាត​កម្ទេចកំទី​នៅតែ​បន្ត​ក្នុង​ទីក្រុង Kyiv ជា​កន្លែង​ដែល​មី​ស៊ី​ល​របស់​រុស្ស៊ី​បាន​វាយប្រហារ ក្នុង​អំឡុង​ដំណើរ​ទស្សនកិច្ច​របស់​ប្រមុខ​អង្គការ​សហ​ប្រជាជាតិ​៕

អត្ថបទ៖ ប៊ុនថន