នៅថ្ងៃព្រហស្បតិ៍ (ទី២ ខែកក្កដា ឆ្នាំ២០២៦) នេះ កងទ័ពអ៊ីរ៉ង់ បានព្រមានថា ការបន្តមាន​វត្តមាននៃយន្តហោះយោធា ទាំង​មាន​មនុស្សបើក និងគ្មានមនុស្សបើករបស់សហរដ្ឋអាមេរិក នៅច្រកសមុទ្រ Hormuz គំរាមកំហែងដល់សន្តិសុខក្នុងតំបន់ ហើយបានសន្យាថា នឹងមានការឆ្លើយតប «យ៉ាង​រហ័ស និងម៉ឺងម៉ាត់» ចំពោះការជ្រៀតជ្រែកណាមួយរបស់អាមេរិក នៅក្នុងផ្លូវទឹកយុទ្ធសាស្ត្រនេះ​។

នៅក្នុងសេចក្តីថ្លែងការណ៍មួយដែលត្រូវបាន​ផ្សាយ​ដោយទីភ្នាក់ងារសារព័ត៌មានពាក់កណ្តាលផ្លូវការ Fars ទីស្នាក់ការកណ្តាល Khatam al-Anbiya បានលើក​ឡើង​ថា ការបន្តមាន​វត្តមាននៃយន្តហោះចម្បាំង និងយានដ្រូន​របស់សហរដ្ឋអាមេរិក នៅច្រកសមុទ្រ Hormuz «បានបង្កឱ្យមានអសន្តិសុខ នៅក្នុងផ្លូវទឹកនេះ ហើយនឹងគំរាមកំហែងដល់សន្តិសុខក្នុងតំបន់»។

សេចក្តីថ្លែងការណ៍នេះ បាន​បន្ថែម​ថា៖ «អ៊ីរ៉ង់នឹងមិនស្ទាក់ស្ទើរក្នុងការចាត់វិធានការណាមួយ ដើម្បីទប់ទល់នឹងការឈ្លានពាន និងការរំលោភបំពានណាមួយដោយយោធាអាមេរិក និងអ្នកគាំទ្ររបស់ខ្លួន ដើម្បី​ការពារអធិបតេយ្យភាពរបស់ខ្លួន នៅ​ច្រកសមុទ្រ Hormuz។ ការជ្រៀតជ្រែកណាមួយរបស់អាមេរិកនៅច្រកសមុទ្រ Hormuz នឹងត្រូវបានឆ្លើយតបយ៉ាងម៉ឺងម៉ាត់ និងរហ័សពីកងកម្លាំងប្រដាប់អាវុធ»។

ទីស្នាក់ការកណ្តាលនេះ​បានពិពណ៌នាអំពីច្រកសមុទ្រ Hormuz ថា ជា «ទឹកដីអធិបតេយ្យរបស់សាធារណរដ្ឋអ៊ិស្លាមអ៊ីរ៉ង់» ហើយថា សន្តិសុខ និងស្ថិរភាពរបស់​ផ្លូវទឹកយុទ្ធសាស្ត្រនេះ​បង្កើតបានជា «ខ្សែបន្ទាត់​ក្រហម» សម្រាប់កងកម្លាំងប្រដាប់អាវុធរបស់ប្រទេស៕