ស្វាយរៀង៖ ប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេស បានចុះពិនិត្យទីតាំងចាក់វ៉ាក់សាំងកូវីដ នៅតាមបណ្តារោងចក្រមួយចំនួនស្ថិតនៅខេត្តស្វាយរៀង។

លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ច​ចាក់​វ៉ាក់សាំង​បង្ការជំងឺកូវីដ១៩ ក្របខ័ណ្ឌទូទាំងប្រទេស រួមដំណើរ​ជាមួយមន្រ្តីសុខាភិបាល និង​អាជ្ញាធរមូលដ្ឋាន នាថ្ងៃទី២៩ ខែមេសា ម្សិលមិញនេះ បានបន្ដចុះពិនិត្យដំណើរការចាក់វ៉ាក់សាំង​បង្ការជំងឺកូវីដ១៩ នៅតាមបណ្ដារោងចក្រមួយចំនួន ស្ថិតក្នុងមូលដ្ឋានខេត្តស្វាយរៀង។

បើតាមប្រសាសន៍​លោកជំទាវវេជ្ជបណ្ឌិត​ ក្រោមកាណែនាំ​របស់​សម្តេច​តេជោ ហ៊ុន សែន នាយករដ្ឋ​មន្រ្តី​កម្ពុជា ​ការ​យកវ៉ាក់សាំង​ទៅចាក់ដល់រោងចក្រ​គឺ​ជា​ចលករ​មួយដ៏សំខាន់ក្នុងការរុញកំណើន​អត្រា​អ្នកចាក់វ៉ាក់សាំងដូសជំរុញ ​ឲ្យកាន់តែកើនឡើងខ្ពស់បន្ថែមទៀត។

លើសពីនេះ លោកជំទាវ បន្តថា ក្រៅពីការយកចិត្តទុកដាក់​គិតគូរ​ដល់​សុខមាលភាពកម្មករ កម្មការិនី​ហើយនោះ ​សម្ដេចតេជោ ហ៊ុន សែន ក៏បានណែនាំឲ្យរៀបចំចាក់វ៉ាក់សាំងនៅតាមទីផ្សារ និងគ្រឹះស្ថានសិក្សាអប់រំជាដើម ​សំដៅធ្វើយ៉ាងណាឲ្យ​ភាពស៊ាំ​សហគមន៍​កាន់​តែ​រឹងមាំ​បន្ថែមទៀត ខណៈរាជរដ្ឋាភិបាល​បាន​ដកចេញនូវកាតព្វកិច្ចមួយចំនួន ​ពិសេសកាតព្វកិច្ចលែង​ពាក់​ម៉ាស់នៅ​តាមទីសាធារណៈនៅទូទាំងប្រទេស។

ការចាក់​វ៉ាក់សាំងកូវីដ-១៩​ ស្រោចលើប្រជាពលរដ្ឋ ត្រូវបានរាជរដ្ឋាភិបាលកម្ពុជា​ ចាត់ទុក​ជា​យុទ្ធសាស្ត្រ​ចម្បង​មួយ ​ដើម្បី​ទប់ស្កាត់​ការ​រីក​រាលដាល​ជំងឺកូវីដ-១៩ ខណៈបច្ចុប្បន្ន​ប្រទេសកម្ពុជា​បើកដំណើរសេដ្ឋកិច្ចធម្មតា ​ជាមួយវត្តមានជំងឺកូវីដ។

បច្ចុប្បន្នប្រទេសកម្ពុជាទទួលបានវ៉ាក់សាំងកូវីដបានជាង៥០លានដូស រាប់​បញ្ជូលទាំង​ការ​បញ្ជាទិញ​ពី​ប្រទេសចិន​ ជំនួយ​តាមរយៈយន្តការកូវ៉ាក់ ​និងបណ្តាប្រទេសផ្សេងៗ​មួយចំនួនទៀត សម្រាប់​ប្រើប្រាស់​ក្នុងយុទ្ធនាការចាក់​វ៉ាក់សាំង​បង្ការជំងឺកូវីដ-១៩​ ជូនពលរដ្ឋអាយុពី៣ឆ្នាំឡើង ចាប់​ពីដូសទី១ ដល់ទី៤៕អត្ថបទ៖ទូច សោភ័ណ