​សហរដ្ឋអាមេរិក៖ ខណៈ​ប្រធានាធិបតី​សហរដ្ឋអាមេរិក​លោក Joe Biden ជំរុញ​សភា​សម្រាប់​ទឹក​ប្រាក់​ចំនួន ៣៣​ពាន់​លាន​ដុល្លារ​បន្ថែម​ទៀត ដើម្បី​ជួយ​ដល់​ការ​ប្រយុទ្ធ​របស់​អ៊ុយ​ក្រែ​ន​ទប់ទល់​ជាមួយ​រុស្ស៊ី ល្បឿន​នៃ​ការ​ដឹក​ជញ្ជូន​យ៉ាង​លឿន​ចេញពី​មូលដ្ឋាន​ទ័ពអាកាស Dover នៅ​រដ្ឋ Delaware បាន​បន្ត​។​

​កាលពី​ថ្ងៃ​សុក្រ យន្តហោះ C-17 ចេញពី​មូលដ្ឋាន​ទ័ពអាកាស MaGuire ក្នុង​រដ្ឋ New Jersey បាន​ផ្ទុក​ដោយ​ការ​ដឹកជញ្ជូន​កាំភ្លើង​ធំ​បាញ់​មី​ស៊ី​ល និង​ឧបករណ៍​ការពារ​ផ្ទាល់ខ្លួន​ សំដៅ​ឆ្ពោះ​ទៅ​ប្រទេស​ប៉ូឡូញក្នុង​ផ្លូវ​ធ្វើដំណើរ​ទៅកាន់​ប្រទេស​អ៊ុយ​ក្រែ​ន​។​ ​លោក Bary Flack មេបញ្ជាការ​ក្រុម​ថែទាំ​ទី​៤៣៦ របស់​កងទ័ពអាកាស​បាន​និយាយ​ថា មូលដ្ឋាន ទ័ព​អាកាស Dover កំពុង​ឆ្លើយតប​ទៅ​នឹង​អាទិភាព​របស់​ប្រធានាធិបតី ​ក្នុង​ការ​គាំទ្រ​អឺរ៉ុប​ខាងកើត និង​ប្រទេស​អ៊ុយ​ក្រែ​ន​។

កញ្ចប់​ថវិកា​ថ្មី​របស់​លោក Biden មានការ​ចំណាយ​លើ​វិស័យ​ការពារ​ជាតិប្រមាណ ២០​ពាន់​លានដុល្លារ​សម្រាប់​ប្រទេស​អ៊ុយ​ក្រែ​ន និង​សម្ព័ន្ធមិត្ត​សហរដ្ឋអាមេរិក​នៅ​ក្នុង​តំបន់ ហើយ ៨.៥​ពាន់​លានដុល្លារ​ដើម្បី​ទុក​ឲ្យ​រដ្ឋាភិបាល​របស់​ប្រធានាធិបតី​អ៊ុយ​ក្រែ​ន​លោក Volodymyr Zelenskyy ផ្តល់​សេវាកម្ម​ផ្សេងៗ និង​ចំណាយ​លើ​ប្រាក់ខែ​។ មាន​ថវិកា​ចំនួន ៣​ពាន់​លាន​ដុល្លារ​នៅ​ក្នុង​កម្មវិធី​ស្បៀង​អាហារ និង​មនុស្សធម៌​សកលរួម​ទាំង​ប្រាក់ ​ដើម្បី​ជួយ​ដល់​ជនភៀសខ្លួន​អ៊ុយ​ក្រែ​ន​ដែល​បាន​ភៀសខ្លួន​ទៅកាន់​អាមេរិក និង​ជួយ​កសិករ​អាមេរិក​ឱ្យ​ដាំ​ស្រូវ​សាលី និង​ដំណាំ​ផ្សេងទៀតដើម្បីជំនួស​ស្បៀងអាហារ​ដ៏​ច្រើន​សន្ធឹកសន្ធាប់ ​ដែល​អ៊ុយ​ក្រែ​ន​ផលិត​បានជា​ធម្មតា​៕

អត្ថបទ៖ ប៊ុនថន