កណ្ដាល៖ ឯកឧត្តម ហេង រតនា ប្រធានក្រុមការងារចុះជួយស្រុកលើដែក ខេត្តកណ្ដាល បានធ្វើការអំពាវនាវដល់សមាជិកបក្សទាំងអស់ ត្រូវតែទប់ស្កាត់ឲ្យបាននូវព័ត៌មានមិនពិតបំពុលសង្គមនៅក្នុងមូលដ្ឋាន និងហ៊ានតតាំងជាមួយនឹងការផ្សព្វផ្សាយណា ដែលវាយប្រហាររាជរដ្ឋាភិបាលស្របច្បាប់ ខណៈរដូវកាលការឃោសនាបោះឆ្នោតជ្រើសរើសក្រុមប្រឹក្សា ឃុំ សង្កាត់ ឆ្នាំ២០២២ កាន់តែជិតឈានចូលមកដល់ ។

ថ្លែងឱកាសចុះ​សំណេះសំណាល​ជាមួយ​សមាជិកបក្ស ក្នុងឃុំកំពុងភ្នំ​ ស្រុកលើដែក នៅព្រឹក​ថ្ងៃទី២៩ ខែឧសភា ឆ្នាំ២០២២នេះ ឯកឧត្តម ​ហេង រតនា ​មានប្រសាសន៍ទៀតថា រាជរដ្ឋាភិបាល​នាពេលបច្ចុប្បន្ន ​ដឹកនាំដោយគណបក្សប្រជាជនកម្ពុជា ​គឺខិតខំខ្លាំងណាស់ ​ក្នុងអភិវឌ្ឍប្រទេសជាតិ ដើម្បី​បម្រើដល់ផលប្រយោជន៍របស់ប្រជាជន ។

ឯកឧត្តម បានបន្តថា ទន្ទឹមនឹងការខិតខំ​ប្រឹងប្រែង ​របស់រាជរដ្ឋាភិបាលនេះ ​ក៏មាន​ក្រុមពួក ឬអ្នក​នយោបាយ​មួយចំនួន​ តែងតែសន្យាខ្យល់ធ្វើនេះធ្វើនោះ ​នៅពេលពួកខ្លួនជាប់ឆ្នោត ដូច្នេះពលរដ្ឋ​សូមមានការប្រុងប្រយ័ត្ន ​ចំពោះពួកជនទាំងអស់នោះ​ ខណៈរដូវកាលនៃការឃោសនា និង​ការបោះឆ្នោត ជ្រើសរើសក្រុមប្រឹក្សាឃុំសង្កាត់ ឆ្នាំ២០២១ ​ក៏កាន់តែជិតមដល់នោះ ។

ឯកឧត្តម ហេង រតនា បានបន្ថែមថា ក្នុងវិបត្តិនៃការរាលដាលជំងឺកូវីដ១៩ ​នៅលើពិភពលោកនេះ គឺរាជរដ្ឋាភិបាលកម្ពុជា ​ដែលមានសម្ដេចតេជោជាប្រមុខដឹកនាំ ​បាន​ខិតខំខ្លាំងណាស់ ក្នុងការ​ស្វែងរកនូវវ៉ាក់សាំងចាក់ជូនប្រជាពលរដ្ឋ​ ឲ្យបានគ្រប់គ្នា ​និងកុំឲ្យវិបត្តិនៃជំងឺនេះ កាន់តែធ្ងន់ធ្ងរ​នៅកម្ពុជា។

ឯកឧត្តម ប្រធានក្រុមការងារ ក៏បានអំពាវនាវដល់ប្រជាពលរដ្ឋ ​សូមបន្តថែរក្សាសុខភាព និង​ចូលរួម​ទប់ស្កាត់ការឆ្លងរាលដាលនៃជំងឺកូវីដ១៩​ ដោយអ្នកចាក់វ៉ាក់សាំងរួចក៏កុំមានការធ្វេសប្រហែស បន្តអនុវត្តវិធានសុខាភិបាល ។

សូមបញ្ជាក់ផងដែរថា ក្នុងឱកាសចុះជួបសំណេះសំណាល​ជាមួយសមាជិកបក្ស​នៅក្នុងឃុំកំពង់ភ្នំ​ផងដែរនោះ ​ឯកឧត្តម ហេង រតនា ក៏បានចុះជួបសំណេះសំណាល​ជាមួយបងប្អូនប្រជាពលរដ្ឋ លោកយាយ​ លោកតាចាស់ៗ ដែលមកពិនិត្យ ​និងព្យាបាលជំងឺដោយឥតគិតថ្លៃពីសំណាក់ក្រុម​គ្រូពេទ្យ ​ដែលស្ថិតនៅក្នុងឃុំព្រែកទម្លាប់៕ អត្ថបទ៖ សៅ យ៉ាម៉ង់