​អ៊ុយក្រែន៖ អភិបាលក្រុង Mariupol របស់​ប្រទេស​អ៊ុយ​ក្រែ​ន​ដែល​ត្រូវ​បាន​ឡោមព័ទ្ធ​បាន​និយាយ​ថា ប្រជាជន និង​ទាហាន​ដែល​លាក់ខ្លួន​នៅ​ក្នុង​រោងចក្រ​ដែក Azovstal កំពុង​អស់​អាហារ ទឹក និង​ថ្នាំពេទ្យ​។ ​លោក Vadym Boichenko អភិបាលក្រុង​បាន​ចាត់​ទុក​ស្ថានភាព​នៅ​រោងចក្រ​ដែក Azovstal ថាជា​នរក​នៅ​លើ​ផែនដី​។​ ​

អគារ​សម័យ​សូ​វៀត​មួយ​នេះ​មាន​បណ្ដាញ​លេណដ្ឋាន​ក្រោម​ដី​ធំ ​ដែល​អាច​ទប់ទល់​ទៅ​នឹង​ការវាយប្រហារ​តាម​អាកាស ហើយ​ជាទី​តាំង​ដែល​កាន់កាប់​ដោយ​អ្នក​ប្រយុទ្ធ​អ៊ុយ​ក្រែ​ន​នៅ​ជាមួយ​ជន​ស៊ីវិល​។​ ​ប៉ុន្តែ​ស្ថានការណ៍​កាន់តែ​អាក្រក់​ទៅៗ បន្ទាប់ពី​រុស្សី​បាន​ទម្លាក់​គ្រាប់បែក​ជាច្រើន​គ្រាប់ ដែល​គេ​ហៅ​ថា​គ្រាប់បែក​ទម្លុះ​លេណដ្ឋាន​។ ​នៅ​ពេល​ដែល​ប្រជាជន​ក្នុង​ទីក្រុង Mariupol ចាក​ចេញពី​ទីក្រុង​ដែល​មានការ​រឹតត្បិត និង​ការ​ខ្វះអាហារ ទឹក​បរិភោគ និង​សម្ភារៈ​ផ្សេងទៀត​ដែល​ត្រូវ​ប្រើប្រាស់​ជា​រៀងរាល់ថ្ងៃ ពួកគេ​និយាយ​ថា ទីក្រុង Mariupol គឺជា​នរក​នៅ​លើ​ផែនដី​។

លោក Boichenko និយាយ​ថា លោក​សង្ឃឹមថា បទ​ឈប់​បាញ់​នឹង​អនុញ្ញាត​ឲ្យ​អ្នក​នៅ​ខាងក្នុង​រោង​ចក្រ​នេះ​ ចាកចេញ​ដោយ​សុវត្ថិភាព​។​ នៅ​ពេល​ដំបូង​រុស្ស៊ី​បាន​ផ្តល់​បទ​ឈប់​បាញ់​មួយ​ ដែល​ត្រូវ​បាន​ច្រានចោល​ដោយ​អ៊ុយ​ក្រែ​ន​ដោយ​និយាយ​ថា ​ទីក្រុង​មូ​ស្គូ​ធ្លាប់​បាន​បំពាន​កិច្ចព្រមព្រៀង​ផ្សេងៗ​ទៀត​៕

អត្ថបទ៖ ប៊ុនថន