កំពង់ស្ពឺ៖ ឯកឧត្តម ហ៊ុន ម៉ានី បានថ្លែងថា«២ឆ្នំាចុងក្រោយនេះ ខ្មែរយើងខំប្រឹងប្រែងជាមួយគ្នាខ្លាំងណាស់ លើគ្រប់មូលដ្ឋាន គ្រប់វិស័យ គ្រប់លទ្ធភាពដែលខ្មែរធ្វើបានមិនសំចៃដៃ ធ្វើយ៉ាងណាដើម្បីធានាបាននូវសេចក្តីសុខ និងសុខុមាលភាពរបស់បងប្អូនប្រជាពលរដ្ឋមកទល់សព្វថ្ងៃនេះ ហើយខ្មែរពិតជាធ្វើបាន។

ថ្លែងក្នុងពិធីសំណេះសំណាលជាមួយភ្នាក់ងារគណបក្សប្រជាជនកម្ពុជាចំនួន៥០២ នាក់ មកពី១៥ឃុំ នៃស្រុកបសេដ្ឋ ខេត្តកំពង់ស្ពឺ នាព្រឹកថ្ងៃទី៣០ ខែមេសា ឆ្នាំ២០២២ ឯកឧត្តម ហ៊ុន ម៉ានី បាន​រម្លឹក​ដល់ស្ថានភាពកាលពី២ឆ្នាំមុនថា “យើងកំពុងរវល់ដឹកនាំប្រទេសជាតិឲ្យរីកចម្រើន ប្រយុទ្ធ​ជាមួយជំងឺកូវីដ-១៩ផង បែរជាក្រុមមនុស្សខ្លះគិតតែពីបង្ករឿង បង្កសកម្មភាពពាលា​អាវ៉ាសែ។

ឯកឧត្តម បានបន្ថែមថា ពេលនេះ ប្រមាណ២ឆ្នាំមុន ប្រជាពលរដ្ឋខ្មែរបានជួបប្រទះ​កាលៈទេសៈនៃ​ការបិទខ្ទប់ ឬ ការរិតត្បិត​សកម្មភាពប្រចាំនានាក្នុងដំណាក់កាលនៃការរីករាលដាលជំងឺកូវីដ-១៩។

ឯកឧត្តម បានអះអាងថា ប្រាកដណាស់ថា យើងជួបប្រទះការលំបាកជាមួយគ្នា ប៉ះពាល់ដល់​ប្រយោជន៍ និងជីវភាពប្រចាំថ្ងៃគ្រប់ៗគ្នា ​តែយន្តការទាំងអស់នោះ គឺជាការសម្រេចចិត្តដោយបង្ខំចិត្ត និងពិតជាពិបាក។ ២ឆ្នំាចុងក្រោយនេះ ខ្មែរយើងខំប្រឹងប្រែងជាមួយគ្នាខ្លាំងណាស់លើគ្រប់មូលដ្ឋាន គ្រប់វិស័យ គ្រប់លទ្ធភាពដែលខ្មែរធ្វើបានមិនសំចៃដៃ ធ្វើយ៉ាងណាដើម្បីធានាបាននូវសេចក្តីសុខ និង​សុខុមាលភាពរបស់បងប្អូនប្រជាពលរដ្ឋមកទល់សព្វថ្ងៃនេះ ​ហើយខ្មែរពិតជាធ្វើបាន។

ឆ្លៀតឱកាសនេះ ឯកឧត្តម តំណាង​រាស្ត្រ បានថ្លែងអំណរគុណចំពោះការ​សហការ​ដ៏ស្អិតរមួត​របស់​បងប្អូនប្រជាពលរដ្ឋ ​ក៏ដូចជាដៃគូផ្សេងៗ ​ជាមួយរាជរដ្ឋាភិបាល ដែលធ្វើឲ្យកម្ពុជារក្សា​បាន​នូវ​លំនឹង​សេដ្ឋកិច្ច ​និងអាចត្រឡប់មកនូវស្ថានភាពដើមវិញ។

ឯកឧត្តម បន្ថែមថា យើងក្រុមគ្រួសារខ្មែរ រួមសុខ រួមទុក រួមគ្នារីកចម្រើនទៅមុខជាមួយគ្នា ជាមួយ​ប្រជាជនកម្ពុជា។

សូមជម្រាបផងដែរថា ក្រៅពីការធ្វើរបាយការណ៍​ពីស្ថានភាពទូទៅនៃកិច្ចការងារ​គណបក្ស​សម្រាប់​ស្រុកបសេដ្ឋ ពិធីសំណេះសំណាល​ព្រឹកនេះ​ក៏មានការ​បញ្ចូល​បន្ថែម​នូវ​បទបង្ហាញអំពីចំណុច​សំខាន់ៗ​នៃ​ទិដ្ឋភាពច្បាប់ ​បទបញ្ជា ​និងនីតិវិធី ​ចែករំលែកដល់អ្នកចូលរួមទាំងអស់សម្រាប់ជាជំនួយ និងការពារភាពស្របច្បាប់​ជូនគណបក្សប្រជាជនកម្ពុជា ក្នុងដំណើរការសង្កេតការបោះឆ្នោត​ជ្រើសរើស​ក្រុមប្រឹក្សា ឃុំ សង្កាត់ ឆ្នាំ២០២២ ក្នុងពេលខាងមុខនេះផងដែរ៕ អត្ថបទ រដ្ឋា