​បាល់ទាត់៖ ​ក្រុមបាល់ទាត់ Everton បាន​បន្ត​ក្តីសង្ឃឹម​របស់ខ្លួន​ក្នុង​ការងើប​ចេញពី​តំបន់​គ្រោះថ្នាក់ ​ក្រោយ​យកឈ្នះ​ក្រុម​តោ​ខៀវ Chelsea ១-០​។ ​​ចាប់ផ្តើម​ប្រកួត​ដោយ​នៅក្នុង​តំបន់​គ្រោះថ្នាក់គម្លាត​ពី​តំបន់​សុវត្ថិភាព ៥ពិន្ទុ​តាម​ពីក្រោយ Leeds និង Burnley នោះ​ខ្សែប្រយុទ្ធ​ប្រេ​ស៊ី​ល Richarlison គឺជា​អ្នក​ស៊ុត​សម្រេច​គ្រាប់​បាល់​ជ័យជំនះ​ឱ្យ Everton ១-០ នៅ​នាទី​ទី៤៦​។

​​ក្រុម​របស់លោក Frank Lampard នៅពេលនេះ​ដេញ​ពីក្រោយ Leeds និង Burnley តែ ២ពិន្ទុ​ទេ និង​នៅសល់​មួយ​ប្រកួត​ក្នុង​ដៃ​។ ​​អ្នកចាំទី Everton, Jordan Pickford ក៏បាន​ដើរតួ​សំខាន់​ក្នុង​ជ័យជំនះ​នេះ​ បន្ទាប់ពី​ជួយសង្គ្រោះ​គ្រាប់​សំខាន់​ជាច្រើនលើក​ពី​ការប៉ុនប៉ង​របស់ Chelsea​។ ​​៥ប្រកួត​ចុងក្រោយ​របស់ Everton រួមមាន​ទៅផ្ទះ Leicester City, ទៅផ្ទះ Watford, ទទួល Brentford, ទទួល Crystal Palace និង​ទៅ​ទឹកដី Arsenal ថ្ងៃ​បិទ​រដូវ​កាល​។

​​ចំណែក​ការប្រកួតប្រជែង​តំណែង Top4 វិញ​ក្រុម​កាំភ្លើង​ធំ Arsenal បន្ត​ឈរ​លេខ ៤ ក្រោយ​យកឈ្នះ​នៅ​ទឹកដី West Ham ២-១ ស្រប​ពេលដែល Tottenham Hotspur ឈរ​លេខ ៥ ក្រោយ​យកឈ្នះ Leicester City ៣-១ ​បន្ត​ដេញ​ពក្រោយ Arsenal ២ពិន្ទុ​។ ៤​ប្រកួត​ចុងក្រោយ​របស់ Spurs រួមមាន​ទៅ​ទឹកដី Liverpool, ទទួល Arsenal, ទទួល Burnley និង​ទៅផ្ទះ Norwich City​។ ​​ចំណែកឯ Arsenal ត្រូវ​បើកទ្វារ​ផ្ទះ​ទទួល Leeds United, ទៅ​ទឹកដី Spurs, ទៅ​ទឹកដី Newcastle និង​ទទួល Everton៕

​អត្ថបទ​៖​នាង សុភា​វុ​ធ