រដ្ឋមន្ត្រី​ការបរទេស​អាល្លឺម៉ង់ នៅថ្ងៃអង្គារ (ទី៧ ខែកក្កដា ឆ្នាំ២០២៦) នេះ បានឱ្យដឹង​​ថា សម្ព័ន្ធមិត្តអង្គការ​ណាតូ (NATO) កំពុងត្រៀមផ្តល់ជំនួយ ១៤០ពាន់លានអឺរ៉ូ (១៦០ពាន់លានដុល្លារ) សម្រាប់អ៊ុយក្រែន នៅឆ្នាំនេះ និងឆ្នាំក្រោយ ដោយពិពណ៌នាអំពីការប្តេជ្ញាចិត្តដែលបានគ្រោងទុកនេះ​ថា ជាការបញ្ជូន​​សញ្ញាមួយទៅកាន់ទីក្រុងមូស្គូថា ការ​គាំទ្រ ចំពោះ​ទីក្រុងគីវ ឥតមាន​ភាព​ប្រែប្រួល​ឡើយ។

មុនកិច្ចប្រជុំកំពូលរបស់ណាតូនៅទីក្រុង Ankara ប្រទេសទួរគី លោក Johann Wadephul បានប្រាប់វិទ្យុ Deutschlandfunkថា៖ «យើងអាចផ្តល់ជំនួយចំនួន ១៤០ពាន់លានអឺរ៉ូដល់អ៊ុយក្រែន សម្រាប់ឆ្នាំ២០២៦ និងឆ្នាំក្រោយ ដោយយកតែពីការចូលរួមវិភាគទានរបស់តំបន់​អឺរ៉ុប និងប្រទេស​កាណាដា។ នេះនឹងជាសញ្ញាដ៏រឹងមាំមួយនៃការគាំទ្រដល់អ៊ុយក្រែន»។

លោក Wadephul បានបន្ត​ថា ការវិវត្ត​ថ្មីៗ នៅសមរភូមិ បានបង្ហាញថា សង្គ្រាមបានចូលដល់ដំណាក់កាលមួយដែលអ៊ុយក្រែនអាចវាយប្រហាររុស្ស៊ីកាន់តែខ្លាំង ដោយបន្ថែមថា នេះបានបង្ហាញថា ការគាំទ្ររបស់លោកខាងលិច កំពុងមានឥទ្ធិពល។ លោកបានបន្ថែម​ថា ការដាក់​សម្ពាធត្រូវតែកើនឡើងបន្ថែមទៀត លើរុស្ស៊ី ដើម្បីជំរុញឱ្យប្រទេសនេះ​ត្រឡប់ទៅកាន់​តុចរចាវិញ។

ជាមួយ​គ្នានេះ ដោយសំដៅទៅលើការពិភាក្សារ រវាងមេដឹកនាំអាល្លឺម៉ង់ បារាំង និងចក្រភពអង់គ្លេស នៅទីក្រុងឡុងដ្រ៍ កាលពីខែមុន លោក Wadephul បានសង្កត់ធ្ងន់​ថា៖ «អឺរ៉ុបបានត្រៀមខ្លួនរួចជាស្រេច ដើម្បីចូលរួមក្នុងការចរចា ដូចដែលអធិការបតីអាល្លឺម៉ង់ លោក (Friedrich) Merz បានបញ្ជាក់យ៉ាងច្បាស់ នៅទីក្រុងឡុងដ្រ៍ រួមជាមួយលោក Emmanuel Macron និងលោក Keir Starmer»៕