ភ្នំពេញ៖ បេក្ខជនក្រុមប្រឹក្សាឃុំ-សង្កាត់ និងសកម្មជនបក្សភ្លើងទៀន សរុប ៧៨រូប បានប្រកាសចូលរួមរស់ជាមួយគណបក្សប្រជាជនកម្ពុជា។

ការបោះឆ្នោតក្រុមប្រឹក្សាឃុំ-សង្កាត់ខិតជិតមកដល់ បេក្ខជនក្រុមប្រឹក្សាឃុំ-សង្កាត់ និងសកម្មជន​របស់​គណបក្សភ្លើងទៀនជាច្រើនរូប បានសម្រេចដើរចេញពីបក្សប្រឆាំងមួយនេះ ជាបន្តបន្ទាប់ ហើយមករួមរស់ជាមួយគណបក្សប្រជាជនកម្ពុជា ​ដែលជា​គណបក្សដ៏ធំ និងចាស់ទុំជាង​គេនៅ​កម្ពុជា។

ពិធីប្រកាស​បញ្ចូល​សមាជិក សមាជិកា គណបក្សប្រជាជនកម្ពុជា ​ដែលមកពី​គណបក្សភ្លើងទៀន បាន​ធ្វើឡើងនៅថ្ងៃទី០១ ខែឧសភា ឆ្នាំ២០២២ នៅទីស្នាក់ការគណបក្សប្រជាជនកម្ពុជា​រាជធានី​ភ្នំពេញ។

ឯកឧត្តម ឃួង ស្រេង សមាជិកគណៈកម្មាធិការកណ្តាលគណបក្សប្រជាជាជនកម្ពុជា​ និង​ជា​ប្រធានគណៈកម្មាធិការគណបក្សប្រជាជាជនកម្ពុជា​រាជធានីភ្នំពេញ ​បានថ្លែងថា សមាជិកថ្មី​ទាំង​៧៨រូបនេះ មាន ៥២រូប ​ជាបេក្ខជនឈរឈ្មោះបោះឆ្នោតឃុំ-សង្កាត់របស់គណបក្សភ្លើងទៀនទាំង​ពេញសិទ្ធិ និងបម្រុង។ ​ដោយឡែក ២៦រូបទៀត ​ជាសកម្មជន នៅតាមបណ្តាសង្កាត់​មួយចំនួន​ក្នុងរាជធានីភ្នំពេញ។

បេក្ខជនក្រុមប្រឹក្សាឃុំ-សង្កាត់ និងសកម្មជនបក្សភ្លើងទៀន ដែលសម្រេចចុះចូលជាមួយ​បក្ស​ប្រជាជន​កម្ពុជា ​បានលើកបង្ហាញថា ​ហេតុផល ដែលនាំឱ្យពួកគេសម្រេចចូលរួមជីវភាពនយោបាយ​ជាមួយគណបក្សប្រជាជនកម្ពុជា ​ដោយសារបានមើលឃើញច្បាស់ពីគុណតម្លៃ និងគោលន​យោបាយ​របស់គណបក្សប្រជាជនកម្ពុជា​ ក្នុងការដឹកនាំ កសាង ​និងអភិវឌ្ឍន៍ទាំងនៅថ្នាក់ជាតិ និងថ្នាក់មូលដ្ឋាន។

បន្ថែមលើនោះ ពួកគេបានយល់ឃើញថា គណបក្សភ្លើងទៀន ​នៅតែបន្តនយោបាយប្រជាភិថុតិ ដែល​ជាសំណល់​មកពីអតីតគណបក្ស សម រង្ស៉ី ហើយគ្មាន​គោល​នយោបាយ​ល្អណាមួយក្នុង​ការ​ធ្វើឱ្យរីកចម្រើនដល់សង្គមជាតិនោះឡើយ។

ក្នុងពិធី​បញ្ចូល​សមាជិកថ្មីមកពីគណបក្សភ្លើងទៀននោះដែរ ​ឯកឧត្តម ឃួង ស្រេង ក៏បាន​លើក​ឡើងថា គណបក្សប្រជាជាជនកម្ពុជា ក្រោមការដឹកនាំ​របស់សម្តេចតេជោ ​ហ៊ុន សែន ជាប្រធាន បាន​លះបង់គ្រប់បែបយ៉ាង​ ដើម្បីស្វែងរកសន្តិភាពជូនប្រជាពលរដ្ឋកម្ពុជា ​ការពារអាយុជីវត និង​មិនទុកឱ្យមានប្រជាពលរដ្ឋណាម្នាក់ ​ស្លាប់ដោយការអត់បាយនោះឡើយ និងមិនមានគណបក្ស​ណា​ហ៊ានលះបង់ ​និងការពារអាយុជីវិតប្រជាជនកម្ពុជា​ដូចគណបក្សប្រជាជាជនកម្ពុជានោះឡើយ។

អ្វីដែលយើងបានឃើញជាក់ស្តែង ​រាជរដ្ឋាភិបាលក្រោមការដឹកនាំ​របស់គណបក្សប្រជាជាជនកម្ពុជា បាន​គិតគូរយ៉ាងខ្លាំង​ខ្លាលើសុខមាលភាពប្រជាពលរដ្ឋ​ ជាក់ស្តែងក្នុងបរិបទជំងឺកូវីដ-១៩នេះ សម្តេច​តេជោ ហ៊ុន សែន បានស្វះស្វែងរកគ្រប់មធ្យោបាយ ​ដើម្បីយកវ៉ាក់សាំងមកចាក់​ជូនប្រជាពលរដ្ឋ​ឱ្យ​បានគ្រប់គ្នា ដោយគិតមកដល់ពេលនេះ​ ប្រជាពលរដ្ឋចាក់ដុសទី៣បានចំនួនជាង ១០០%ហើយ ហើយបាន​និងកំពុងដំណើរការចាក់ដូសទី៤ ជូនប្រជាពលរដ្ឋបន្ថែមទៀត៕ អត្ថបទ៖ ឡាយោ