​​បាល់ទាត់៖ ​ក្លិប​បាល់ទាត់ Trabzonspor បាន​គ្រង​ជើងឯក​លី​គ​កំពូល​ទួរគី Turkish Super League ជា​លើកដំបូង​ក្នុង​រយៈពេល ៣៨ឆ្នាំក្រោយ​ស្មើ ២-២ ទល់នឹង Antalyaspor កាលពី​ចុង​សប្តាហ៍​កន្លងទៅ​។ ​​អ្នកគាំទ្រ​បាន​រត់​ចូលក្នុង​ទីលាន​តែម្តង​ក្រោយ​ចប់​ការប្រកួត ជា​អ្វីដែល​អ្នកគាំទ្រ​ទន្ទឹងរង់ចាំ ៣៨ឆ្នាំ​។

​​មួយ​ពិន្ទុ​ពី​ការប្រកួត​នេះ​ធ្វើឱ្យ Trabzonspor ដាច់​ក្រុម​លេខ២ Fenerbahce ដល់​ទៅ ៩ពិន្ទុ​នៅសល់ ៣ប្រកួត​ទៀត​ចប់​រដូវ​កាល​តែ Trabzonspor មាន​ស្ថិតិ​មួយ​ទល់​មួយ​ល្អ​ជាង​បើ​ប្រៀបធៀប​ទល់នឹង​ក្រុម​លេខ២ Fenerbahce​។ ​​នេះ​ជា​ជើងឯក​លី​គ​ទួរគី​លើក​ទី៧ សំរាប់ Trabzonspor តែ​ជា​លើកដំបូង​តាំងពី​ឈ្នះ​ចុងក្រោយ​នៅ​រដូវ​កាល ១៩៨៣-៨៤​។ ​​គិត​មកដល់ពេលនេះ​មាន​ក្លិប​តែ ៦ ទេ​ដែល​ធ្លាប់​ឈ្នះ​ជើងឯក​លី​គ​កំពូល​ទួរគី​រួមមាន Galatasaray ឈ្នះ​ច្រើនជាងគេ​សរុប ២២លើក, Fenerbahce ១៩លើក, Besiktas ១៦លើក, Trabzonspor ៧លើក, Istanbul Basaksehir ១លើក និង Bursaspor ១​លើក​។ ​​Besiktas គឺជា​ក្រុម​ជើងឯក​រដូវ​កាល​មុន​តែ​រដូវ​កាល​នេះ​ធ្លាក់​ដល់​លេខ ៩ ស្រប​ពេលដែល​ក្រុម​ឈ្នះ​ជើងឯក​ច្រើនជាងគេ Galatasaray នៅ​លេខ ១២ ឯណោះ​៕

​អត្ថបទ​៖​នាង សុភា​វុ​ធ