ភ្នំពេញ៖ ឯកឧត្តម ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) ក្រើនរំលឹកថា ចំពោះដំណើរការបោះឆ្នោតឃុំ-សង្កាត់នាពេលខាងមុខ មានតែអត្តសញ្ញាណប័ណ្ណមួយគត់ប្រើប្រាស់សម្រាប់ការបោះឆ្នោត។

ថ្លែងប្រាប់ BTV News នៅថ្ងៃទី២ ខែឧសភានេះ ឯកឧត្តម ហង្ស ពុទ្ធា បានឲ្យដឹងថា បន្ទាប់ពីដំណើរ​ការឈរឈ្មោះបេក្ខជន ការចុះបញ្ជីបេក្ខជនគណបក្សនយោបាយ និងការប្រកាសសុពលភាពបញ្ជីបេក្ខជនគណបក្សនយោបាយត្រូវបានបញ្ចប់។

ឯកឧត្តម ហង្ស ពុទ្ធា បន្តថា ក្នុងពេលបច្ចុប្បន្នគណៈកម្មការឃុំ-សង្កាត់រៀបចំការបោះឆ្នោត បាន​ដំណើរការ​ចុះចែកប័ណ្ណព័ត៌មានអ្នកបោះឆ្នោតជូនប្រជាពលរដ្ឋ ​ដើម្បី​ជាព័ត៌មាន​សម្រាប់​ការ​ត្រៀមខ្លួន​ចូលរួមការបោះឆ្នោតជ្រើសរើសក្រុមប្រឹក្សាឃុំ-សង្កាត់។

ឯកឧត្តម បញ្ជាក់ថា ប័ណ្ណព័ត៌មានអ្នកបោះឆ្នោតគឺជាការអញ្ជើញ និងបញ្ជាក់អំពីព័ត៌មានលម្អិត​របស់​បុគ្គលភាព​អ្នកបោះឆ្នោតតែប៉ុណ្ណោះ ខណៈក្នុងពេលបោះឆ្នោតប្រជាពលរដ្ឋត្រូវប្រើប្រាស់​អត្តសញ្ញាណប័ណ្ណ​តែមួយគត់ ​ដើម្បីចូលរួមបោះឆ្នោត។

ពាក់ព័ន្ធនឹងដំណើរការចែកប័ណ្ណព័ត៌មានអ្នកបោះឆ្នោតនេះ ឯកឧត្តម ហង្ស ពុទ្ធា ឲ្យដឹងទៀតថា តាមបណ្តារាជធានី-ខេត្តនៅទូទាំងប្រទេស បានចែកជូនប្រជាពលរដ្ឋសរុបនឹងស្មើនឹងចំនួនជាង ៥៦ភាគរយ។ ក្នុងនោះ ​មានរាជធានី-ខេត្តចំនួន៥បានចែកស្ទើរតែរួចទាំងស្រុង។

អ្នកនាំពាក្យ គ.ជ.ប បន្ថែមថា តាមរយៈប័ណ្ណព័ត៌មានអ្នកបោះឆ្នោតដែលចែកជូនប្រជាពលរដ្ឋ​នឹង​អាចឲ្យប្រជាពលរដ្ឋមានឈ្មោះក្នុងបញ្ជីបោះឆ្នោតត្រៀមខ្លួន ​ដើម្បីចូលរួមការបោះឆ្នោតឃុំ-សង្កាត់ អាណ្ណតិទី៥ ឆ្នាំ២០២២។

គួរបញ្ជាក់ថា បន្ទាប់ពីការចុះចែកប័ណ្ណព័ត៌មានអ្នកបោះឆ្នោត​ជូនប្រជាពលរដ្ឋនៅទូទាំងប្រទេស គ.ជ.ប នឹង​ឈានទៅរកការត្រៀមដំណើរការឃោសនាបោះឆ្នោត​របស់គណបក្សនយោបាយ ខណៈការ​បោះឆ្នោតជ្រើសរើសក្រុមប្រឹក្សាឃុំ-សង្កាត់ ​នឹងប្រព្រឹត្តទៅនៅថ្ងៃទី៥ ខែមិថុនា ខាងមុខនេះ៕អត្ថបទ សេក ឧត្តម