ភ្នំពេញ៖ ក្នុងរយៈពេលប៉ុន្មានថ្ងៃចុងក្រោយនេះ គេសំគាល់ឃើញថា នៅមុខសារមន្ទីរជាតិនៅរាជធានីភ្នំពេញ គឺមានក្រុមអ្នករត់រឺម៉កកង់បី ចាប់ផ្តើមមានកំរើកច្រើន ហើយបាននិងកំពុងនាំគ្នាទៅរង់ចាំដឹកភ្ញៀវទេសចរជាតិអន្តរជាតិ ចេញចូលទស្សនាសារមន្ទីរជាតិជាច្រើនហូរហែរឥតដាច់ និងបានរកចំណូលចិញ្ចឹមជីវភាពក្នុងគ្រួសារបានល្អប្រសើរវិញ។

បើតាមបណ្តាពលរដ្ឋប្រកបរបររឺម៉កកង់បីប្រចាំនៅសារមន្ទីរជាតិ ថ្លែងប្រាប់BTV ថា នៅក្នុង​រយៈពេល​ប៉ុន្មាន​ខែចុងក្រោយនេះ ភ្ញៀវទេសចរជាតិអន្តរជាតិ​បានចាប់ផ្តើមមានកំរើក​ល្អ​ប្រសើរ​ឡើង​វិញ ​ក្នុងចូលរួមមកទស្សនាមន្ទីរជាតិនេះ តាមរយៈការអញ្ជើញភ្ញៀវអន្តរជាតិ​ចូលរួម​ទស្សនា​នេះ បានធ្វើអោយពលរដ្ឋប្រកបរបររកពីចំណូលនៅម្តុំសារមន្ទីរជាតិនេះ គឺអាចចំណូលបានល្អ​ប្រសើរ​ឡើងវិញ ដើម្បីផ្គត់ផ្គង់​ជីវភាពគ្រួសារ ខណៈការរកចំណូលបានបែបនេះគឺបានអាកខាន​អស់រយៈពេលជិត២ឆ្នាំដោយសារការរាតត្បាតកូវីដ១៩។

បើតាមលោកស្រី សែម សោភ័ណ្ឌ លក្ខិណា ប្រធានការិយាល័យរដ្ឋបាល សារមន្ទីរជាតិ ថ្លែងថា ចាប់តាំង​ពីរាជរដ្ឋាភិបាល បានប្រកាសបើកទទួលទេសចរអន្តរជាតិ​ចាក់វ៉ាក់សំាងដោយ​មាន​ការ​លើកលែង​ការធ្វើចត្តាឡីស័ក ​ការមិនធ្វើតេស្តកូវីដ១៩​ និងមានការបើកធ្វើ VISA ON ARRIVALមក សំគាល់ឃើញថា ​មានភ្ញៀវទេសចរជាតិ និងអន្តរជាតិចូលទិញសំបុត្រទស្សនាសារមន្ទីរមាន​ចំនួន​ច្រើនឡើងវិញ ជាពិសេសក្នុងរយៈពេលប៉ុន្មានថ្ងៃចុងក្រោយនេះ មានភ្ញៀវអន្តរជាតិចូលទស្សនាក្នុង​កំណើន​ពី៧០ទៅ១០០នាក់ក្នុង១ថ្ងៃៗ។

លោកស្រី ក៏បានបញ្ជាក់ដែរថា សម្រាប់ការបើកសារមន្ទីរជាតិឡើងវិញនៅក្នុងអំឡុងពេលនេះ យើងក៏បាន​មាន​បន្ធូរបន្ថយ​លក្ខខណ្ឌ​ជូនភ្ញៀវចេញចូលសារមន្ទីរជាតិផងដែរ ក្នុងភ្ញៀវគឺអាចធ្វើដើរ​ទស្សនា​ដោយត្រូវពាក់ម៉ាស់ក៏បាន​ និងមិនពាក់ម៉ាស់ក៏បាន ​ប៉ុន្តែសម្រាប់ការដាក់មន្ត្រី​ឈរចាំពិនិត្យ និងវ៉ាស់កំដៅ​ លើភ្ញៀវចូលទស្សនា​គឺត្រូវ​បន្តធ្វើជាចាំបាច់ ជាមួយនឹងប្រើប្រាស់អាកុលជែលដែល​ត្រូវបានដាក់​តាមបន្ទប់ទឹក ​និងច្រកភ្ញៀវចេញចូលនានាទៀត ។

ទោះយ៉ាងណាសម្រាប់​ការអនុវត្តគោលការណ៍នេះ គឺបានផ្តល់​សេចក្តីទំនុកចិត្តខ្ពស់ជូន បាន​ធ្វើអោយគោលដៅទេសចរណ៍នៅសារមន្ទីរជាតិ ​គឺជាគោលដៅមានសុវត្ថិភាពខ្ពស់ និងកំពុងមាន​ទាក់ទាញ​ភ្ញៀវទស្សនាជាហូរហែរ៕ អត្ថបទ ស៊ុម សុខជា