ទីភ្នាក់ងារសុវត្ថិភាពអាកាសចរណ៍សហភាពអឺរ៉ុប (EASA) បាននិយាយកាលពីថ្ងៃពុធថា ក្រុមហ៊ុនអាកាសចរណ៍ មិនគួរធ្វើប្រតិបត្តិការ នៅក្នុងដែនអាកាសអ៊ីរ៉ង់ អ៊ីរ៉ាក់ និងលីបង់ទេ ស្របពេលមានភាពតានតឹងដែលកំពុងបន្ត និងសក្តានុពលសម្រាប់សកម្មភាពយោធាបន្ថែមទៀត ខណៈដែលសហរដ្ឋអាមេរិក និងអ៊ីរ៉ង់បានវាយប្រហារគ្នាថ្មីៗនេះ។

EASA បាននិយាយថា សេចក្តីជូនដំណឹងរបស់ខ្លួនសម្រាប់ដែនអាកាសអ៊ីរ៉ង់ អ៊ីរ៉ាក់ និងលីបង់មានសុពលភាពរហូតដល់ថ្ងៃទី ៣១ ខែសីហា។

ទីភ្នាក់ងារនេះបានបញ្ជាក់ថា ខ្លួនបានដកសេចក្តីជូនដំណឹងមុនរបស់ខ្លួន ដែលបានស្នើសុំឲ្យក្រុមហ៊ុនអាកាសចរណ៍ប្រុងប្រយ័ត្ន នៅពេលធ្វើប្រតិបត្តិការនៅក្នុងដែនអាកាសបារ៉ែន កូវ៉ែត អ៊ីស្រាអែល ហ្ស៊កដានី កាតា អូម៉ង់ អេមីរ៉ាតអារ៉ាប់រួម និងអារ៉ាប៊ីសាអ៊ូឌីត។

ពុំមិនច្បាស់ថាតើ EASA នឹងចេញសេចក្តីជូនដំណឹងថ្មីសម្រាប់ប្រទេសទាំងនោះឬអត់នោះទេ។

សេចក្តីជូនដំណឹងចុងក្រោយរបស់ទីភ្នាក់ងារនេះ បានកើតឡើង បន្ទាប់ពីឆ្មាំបដិវត្តន៍អ៊ីរ៉ង់បាននិយាយថា ពួកគេបានកំណត់គោលដៅទីតាំងយោធាអាមេរិកនៅបារ៉ែន និងកូវ៉ែតកាលពីថ្ងៃពុធ៕