ត្បូងឃ្មុំ៖ ឯកឧត្តម ជា សុផារ៉ា ប្រធានក្រុមការងាររាជរដ្ឋាភិបាលចុះ មូលដ្ឋានខេត្តត្បូងឃ្មុំ កាលពីថ្ងៃទី០១ ខែឧសភា ឆ្នាំ២០២២ បានអញ្ជើញជួបសំណេះសំណាលជាមួយប្រជាពលរដ្ឋនៅឃុំរំចេក និងឃុំកំពាន់ ស្រុកមេមត់ ខេត្តត្បូងឃ្មុំ។

ឯកឧត្តមឧបនាយករដ្ឋមន្រ្តី ជា សុផារ៉ា បានក្រើន រំលឹកប្រជាពលរដ្ឋអំពី​កាលបរិច្ឆេទ​ នៃការបោះឆ្នោតជ្រើសរើសក្រុមប្រឹក្សាឃុំអាណត្តិទី០៥ នៅខែមិថុនា ឆ្នាំ២០២២ និងបានណែនាំដល់បេក្ខជនពេញសិទ្ធិ និងបម្រុងប្រធានក្រុមបក្ស ប្រធាន​សាខាគណបក្សភូមិ ឃុំ ដែលជាជនបង្គោល ជាជនបង្អែក ដែល​អាច​ផ្ដល់​ទំនុក​ចិត្ត​ដល់​ប្រជាពលរដ្ឋ​នោះ ត្រូវត្រៀមខ្លួន ​និងយកចិត្តទុកដាក់ខិតខំប្រឹងប្រែងរៀបចំទិសដៅឱ្យ​បានច្បាស់លាស់ ដើម្បី​គាំទ្រ​ដល់ដំណើរការបោះឆ្នោតនេះ សំដៅឱ្យគណបក្សប្រជាជនកម្ពុជា ​ទទួលបានប្រៀបឈ្នះ។

ឯកឧត្ដម បានណែនាំឱ្យចុះជួបសមាជិកតាមខ្នងផ្ទះនីមួយៗ គ្រប់គ្រង​ចំនួន​សមាជិក​របស់ខ្លួន​ឲ្យ​បានល្អ និងនាំប្រជាពលរដ្ឋទៅបោះឆ្នោតឲ្យបានគ្រប់ៗគ្នា ដោយបោះឆ្នោតជូនគណបក្ស​ប្រជាជន​កម្ពុជា។

ឯកឧត្តម បានបញ្ជាក់ថា ការបោះឆ្នោតនេះ ​គឺ​មានសារសំខាន់​ណាស់​សម្រាប់ប្រជាពលរដ្ឋ ពី​ព្រោះឃុំ ​គឺជាអ្នកផ្ដល់សេវាគ្រប់​បែប​យ៉ាង​ដល់​ប្រជាពលរដ្ឋ។

ឯកឧត្ដម សង្ឃឹមថា បេក្ខជនរបស់​គណបក្សប្រជាជនកម្ពុជា​ ដែលឈរឈ្មោះបោះឆ្នោត ប្រធាន​ក្រុមបក្សប្រធានសាខាគណបក្សភូមិឃុំ ​និងសមាជិក ​សមាជិកាបក្សទាំងអស់​នៅឃុំទាំងពីរនេះ និង​សហការគ្នាយ៉ាង​ជិតស្និទ្ធ ​ពួតដៃ​គ្នាជាធ្លុងមួយ ​ដើម្បីសម្រេចជោគជ័យ​នៅក្នុងការបោះឆ្នោត​ជ្រើសរើស​ក្រុមប្រឹក្សាឃុំ-សង្កាត់ អាណត្ដិទី៥នេះ ៕ អត្ថបទ៖ ថុង សីហា