សហភាពអឺរ៉ុប (EU) នៅ​ថ្ងៃព្រហស្បតិ៍ (ទី​៩ ខែកក្កដា ឆ្នាំ២០២៦) នេះ បានលើក​ឡើង​នូវ​ក្របខ័ណ្ឌទណ្ឌកម្មថ្មីមួយ ដែលផ្តោតលើការរត់ពន្ធជនអន្តោប្រវេសន៍ ការជួញដូរមនុស្ស និងទម្រង់ផ្សេងទៀតនៃក្រុម​ឧក្រិដ្ឋកម្ម ដែលនឹងដាក់ការបង្កកទ្រព្យសម្បត្តិ និងហាមឃាត់ការធ្វើដំណើរលើជនល្មើស។

ដោយសំដៅទៅលើការបង្ក្រាបលើអ្នករត់ពន្ធ និង​អ្នក​ជួញដូរ​ជនអន្តោប្រវេសន៍ ប្រធានគណៈកម្មការអឺរ៉ុប លោកស្រី Ursula von der Leyen បានឱ្យដឹង​នៅក្នុងសេចក្តីថ្លែងការណ៍មួយថា៖ «យើងទាំងអស់គ្នាមានគោលដៅរួម។ ដើម្បីធ្វើ​ឱ្យ​ជន​ទាំង​នោះ​មិន​ប្រកប​​អាជីវកម្មបែប​នេះ​។ ហើយ​ដើម្បីជួយសង្គ្រោះជីវិតមនុស្សរាប់ពាន់នាក់ដែលស្រមៃចង់បានជីវិតកាន់តែល្អ​ប្រសើរ។ យើងជាប្រជាជនអឺរ៉ុប ត្រូវតែជាអ្នកសម្រេចថា អ្នកណាត្រូវ​មកកាន់​ទីកន្លែង​របស់យើង​ ហើយ​មក​ក្នុងកាលៈទេសៈណា»។

សំណើនេះតម្រូវឱ្យមានការយល់ព្រមជាឯកច្ឆ័ន្ទពីក្រុមប្រឹក្សាអឺរ៉ុប មុនពេលវាអាចត្រូវបាន​អនុវត្ត។ ការប្រកាសនេះកើតឡើងក្នុងពេល​មាន​ការជជែកដេញ​ដោល​យ៉ាង​តាន​តឹង​ ជុំវិញគោលនយោបាយទេសន្តរប្រវេសន៍ នៅ EU។

កាលពីខែមុន សភាអឺរ៉ុបបានអនុម័តកំណែច្បាប់ទេសន្តរប្រវេសន៍ ដែលមានគោលបំណងធ្វើឱ្យការនិរទេសងាយស្រួល​ជាងមុន​ និងអនុញ្ញាតឱ្យមានមជ្ឈមណ្ឌលឃុំឃាំងនៅក្រៅដែន​ដី​របស់​តំបន់​៕