ប្រព័ន្ធផ្សព្វផ្សាយរដ្ឋ KCNA បានរាយការណ៍នៅថ្ងៃសុក្រ១០កក្កដា សប្ដាហ៍នេះថា កូរ៉េខាងជើងបានសម្រេចចិត្តលើវិធានការដើម្បីពង្រឹងកម្លាំងនុយក្លេអ៊ែររបស់ខ្លួន "ទាំងបរិមាណ និងគុណភាព" ខណៈមេដឹកនាំ លោកគីម ជុងអ៊ុន (Kim Jong Un)បានអំពាវនាវឱ្យធ្វើទំនើបកម្មយោធារបស់ខ្លួន ។

ប្រព័ន្ធផ្សព្វផ្សាយរដ្ឋ KCNA ដដែល និយាយថា វិធានការ និងការកត់សម្គាល់របស់លោក គីម បានកើតឡើងក្នុងអំឡុងពេលកិច្ចប្រជុំដ៏ទូលំទូលាយមួយរបស់គណៈកម្មការយោធាកណ្តាលនៃគណបក្សពលករកាន់អំណាចកាលពីថ្ងៃព្រហស្បតិ៍ សប្ដាហ៍នេះ ។

យោងតាមរបាយការណ៍ លោក គីម បាននិយាយថា សន្តិសុខ និងសន្តិភាពពិតប្រាកដ របស់កូរ៉េខាងជើងអាចត្រូវបានធានាបានលុះត្រាតែមានការកសាងយោធាដ៏មានឥទ្ធិពលដែលមានសមត្ថភាពគ្រប់គ្រងការគំរាមកំហែងទាំងអស់។

ប្រភពខាងលើនិយាយថា កិច្ចប្រជុំនេះបានកំណត់ផែនការដើម្បីបន្តហេដ្ឋារចនាសម្ព័ន្ធបច្ចេកទេសនៃប្រព័ន្ធប្រយុទ្ធ ពង្រីក និងពង្រឹងកម្លាំងនុយក្លេអ៊ែរ និងធ្វើឱ្យមូលដ្ឋានយោធាមានស្តង់ដារ ឯកទេស និងទំនើបកម្ម ។

របាយការណ៍បានបន្ថែមថា កិច្ចប្រជុំនេះ ក៏បានពិភាក្សាផងដែរ អំពីការពង្រីកតួនាទីរបស់ការិយាល័យចារកម្ម ដែលជាទីភ្នាក់ងារស៊ើបការណ៍សម្ងាត់យោធារបស់កូរ៉េខាងជើង ដើម្បីកែលម្អសមត្ថភាពស៊ើបការណ៍សម្ងាត់ និងការប្រមូលព័ត៌មានចារកម្មរបស់ខ្លួន។

KCNA ខាងលើនេះ បាននិយាយថា កិច្ចប្រជុំនេះបានលើកយកបញ្ហាសាងសង់មូលដ្ឋានទ័ពជើងទឹកទំនើបៗ និងការធ្វើឱ្យប្រសើរឡើងនូវសមត្ថភាពរោងចក្រផលិតនាវា ដោយឆ្លុះបញ្ចាំងពីអ្វីដែលខ្លួនហៅថាជាការផ្លាស់ប្តូរដ៏សំខាន់មួយនៅក្នុងឋានៈ និងតួនាទីរបស់កងទ័ពជើងទឹក៕