កណ្ដាល ៖ ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ចំនួន១០៤៥នាក់ បានចុះចាក់វ៉ាក់សាំងបង្ការជំងឺកូវីដ-១៩ ដោយមិនគិតថវិកាបេសកកម្ម និងពិនិត្យ ព្យាបាលជំងឺ អប់រំសុខភាព រួមទាំងចែកថ្នាំពេទ្យដោយឥតគិតថ្លៃ ជូនបងប្អូនប្រជាពលរដ្ឋ ចំនួន៩៧៥៦នាក់ (ស្រី ៦២៧៥នាក់) ព្រមទាំងបានបណ្តុះបណ្តាលអំពីវិធីសាស្ត្រសង្គ្រោះបឋម ជូនដល់ប្អូនៗសិស្សានុសិស្ស និងកងកម្លាំងប្រដាប់អាវុធ នៅវិទ្យាល័យ ហ៊ុន សែន ស្អាង ស្រុកស្អាង ខេត្តកណ្តាល។

​សកម្មភាពសប្បុរសធម៌ដ៏ល្អថ្លៃថ្លារបស់ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី លើទឹកដីស្រុកស្អាង ខេត្តកណ្តាលនេះ ដឹកនាំដោយឯកឧត្តម លេង ផាលី រដ្ឋលេខាធិការក្រសួងផែនការ និងជាប្រធានប្រតិបត្តិក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី តំណាងឯកឧត្តម ហ៊ុន ម៉ានី ប្រធានកិត្តិយសក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ដោយមានការអញ្ជើញចូលរួមពីឯកឧត្តម ចែម វីឌ្យ៉ា រដ្ឋលេខាធិការក្រសួងការបរទេស តំណាងឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកស្អាង និងឯកឧត្តម គង់ សោភ័ណ្ឌ អភិបាលខេត្តណ្តាល ឯកឧត្តម វេជ្ជបណ្ឌិត គួយ ប៊ុនធឿន អនុប្រធានប្រតិបត្តិ ទទួលបន្ទុកប្រធានប្រតិបត្តិក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ខេត្តកណ្តាល និងជាប្រធានមន្ទីរសុខាភិបាលខេត្តកណ្តាល ព្រមទាំងឯកឧត្តម លោកជំទាវ លោក លោកស្រី ប្រធានមន្ទីរអង្គភាពពាក់ព័ន្ធជុំវិញខេត្ត សាខាសកម្មជនក្រុមការងារយុវជនរាជធានីភ្នំពេញ កងកម្លាំងប្រដាប់អាវុធ យុវជនសហភាពសហព័ន្ធយុវជនកម្ពុជា យុវជនកាយរិទ្ធកម្ពុជា យុវជនកាកបាទក្រហមកម្ពុជា ស្រុក-ខេត្ត រួមជាមួយអាជ្ញាធរមូលដ្ឋាន។

ឯកឧត្តម លេង ផាលី បានពាំនាំនូវប្រសាសន៍ផ្តាំផ្ញើសាកសួរទុក្ខពីសំណាក់ឯកឧត្តម ហ៊ុន ម៉ានី ប្រធានកិតិ្តយសក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ដែលជានិច្ចកាលឯកឧត្តម ហ៊ុន ម៉ានី តែងគិតគូរនិងខ្វល់ខ្វាយពីសុខទុក្ខ និងបញ្ហាសុខុមាលភាពរបស់បងប្អូនប្រជាពលរដ្ឋ។ ជាពិសេសរយៈពេល ១០ឆ្នាំកន្លងមកនេះ ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី បានបំពេញការងារយ៉ាងសកម្មនៅតាមសហគមន៍មូលដ្ឋាន ដើម្បីសុខុមាលភាព និងស្នាមញញឹមជូនប្រជាពលរដ្ឋ ក៏ដូចជាបាននិងកំពុងចូលរួមជាមួយរាជរដ្ឋាភិបាល ក្នុងការលើកម្ពស់សុខភាពប្រជាជននៅតាមសហគមន៍ តាមរយៈការពិគ្រោះ ពិនិត្យ ព្យាបាលជំងឺ និងចែកថ្នាំពេទ្យ រួមទាំងការចុះអប់រំសុខភាព និងបានចូលរួមក្នុងយុទ្ធនាការចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេស ជូនបងប្អូនប្រជាពលរដ្ឋដោយឥតគិតថ្លៃ។ 

នាឱកាសនោះ ឯកឧត្តម គង់ សោភ័ណ្ឌ បានថ្លែងអំណរគុណយ៉ាងជ្រាលជ្រៅ ជូនចំពោះ ឯកឧត្តម ហ៊ុន ម៉ានី ប្រធានកិត្តិយសក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ក្រោមការដឹកនាំផ្ទាល់ពីឯកឧត្តម លេង ផាលី ប្រធានប្រតិបត្តិក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ដែលបានជួយពិគ្រោះ និងពិនិត្យព្យាបាលជំងឺ ព្រមទាំង ចាក់វ៉ាក់សាំងបង្ការជំងឺកូវីដ-១៩ ជូនកុមារ យុវវ័យ និងប្រជាពលរដ្ឋនៅក្នុងស្រុកស្អាង ខេត្តកណ្តាល ដោយមិនគិតថ្លៃ។ ទន្ទឹមនឹងឯកឧត្តម អភិបាលខេត្ត ក៏បានសំណូមពរដល់ក្រុមគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី សូមបន្តចុះជួយពិនិត្យ និងព្យាបាលជំងឺជូនប្រជាពលរដ្ឋ នាពេលក្រោយៗទៀត សំដៅលើកកម្ពស់សុខុមាលភាពប្រជាពលរដ្ឋ និងរួមគ្នាកាត់បន្ថយភាពក្រីក្រ ស្របពេលដែលប្រទេសជាតិកំពុងមានសុខសន្តិភាព ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ 

ឯកឧត្តម គង់ សោភ័ណ្ឌ បានសង្កត់ធ្ងន់ថា សកម្មភាពសប្បុរសធម៌ ដែលមិនអាចកាត់ថ្លៃបានរបស់ក្រុមគ្រូពេទ្យស្ម័គ្រចិត្តឯកឧត្តម ហ៊ុន ម៉ានី នេះគឺជាការចូលរួមចំណែកក្នុងការបំពេញបេសកកម្មការងារប្រកបដោយឆន្ទៈដ៏ស្រួចស្រាល់ និងបង្ហាញពីស្មារតីផូរផង់សម្រាប់ជាគំរូដល់យុវជនជំនាន់ក្រោយក្នុងការអភិវឌ្ឍប្រទេសជាតិ នៅក្នុងបុព្វហេតុនានា ពិសេសក្នុងវិស័យសុខាភិបាល ដោយមិនប្រកាន់ពូជសាសន៍ សាសនា ឬនិន្នាការនយោបាយណាមួយឡើយ សំដៅចូលរួមកាត់បន្ថយភាពក្រីក្ររបស់ប្រជាពលរដ្ឋ និងស្របតាមគោលដៅអភិវឌ្ឍប្រកបដោយចីរភាព និងបរិយាប័ន្ន របស់រាជរដ្ឋាភិបាលកម្ពុជា។

សូមបញ្ជាក់ផងដែរថា ក្នុងរយៈពេល១០ឆ្នាំ (០២ ធ្នូ ឆ្នាំ២០១២ ដល់ ០១ ឧសភា ឆ្នាំ២០២២) ក្រោមការដឹកនាំចង្អុលបង្ហាញដោយផ្ទាល់របស់ឯកឧត្តម ហ៊ុន ម៉ានី ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី មានចំនួន៦,៧៧៩នាក់ បានចុះអប់រំផ្សព្វផ្សាយជំងឺកូវីដ-១៩ យុទ្ធនាការចាក់វ៉ាក់សាំងបង្កាកូវីដ-១៩ ក្នុងក្របខណ្ឌទូទាំងប្រទេស សង្រ្គោះបឋម យកសំណាករកវីរុសកូវីដ-១៩ និងពិនិត្យ ព្យាបាលជំងឺជូនប្រជាពលរដ្ឋដោយឥតគិតថ្លៃក្នុង២៥ រាជធានី-ខេត្ត នៃព្រះរាជាណាចក្រកម្ពុជា បានចំនួន៥៨០លើក មានប្រជាពលរដ្ឋចូលរួមចំនួន ៨,០០៦,៣៣៨នាក់ (ប្រាំបីលាន ប្រាំមួយពាន់ បីរយ សាមសិប ប្រាំបីនាក់) ជាង១ភាគ២ នៃប្រជាជនសរុបទូទាំងប្រទេសចំនួន ១៥,៥៥២,២២១ នាក់ (ដប់ប្រាំលាន ហាសិបប្រាំម៉ឺន ពីរពាន់ ពីររយ ម្ភៃ មួយនាក់)៕អត្ថបទ ៖ រដ្ឋា