ភ្នំពេញ ៖ ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី សាខាខេត្តកំពង់ស្ពឺ ចំនួន១៨រូប បែងចែកជា២ក្រុម នៅថ្ងៃទី២០ មីនា ម្សិលមិញ បានចុះអប់រំប្រជាពលរដ្ឋ តាមខ្នងផ្ទះតំបន់ដាច់ស្រយាល នៅភូមិដីឆ្នាំង ឃុំហោងសំណំ ស្រុកឱរ៉ាល់ ត្រូវអនុវត្តនូវវិធានការ ៣ការពារ ៣កុំ ដើម្បីចូលរួមជាមួយរាជរដ្ឋាភិបាលក្នុងការបញ្ចប់ព្រឹត្តិការណ៍សហគមន៍ ២០កុម្ភៈ ក៏ដូចជាបញ្ចប់ជំងឺកូវីដ-១៩ ពីប្រទេសកម្ពុជា។
សកម្មភាពចុះអប់រំ ផ្សព្វផ្សាយខាងលើនេះ ដឹកនាំដោយលោកវេជ្ជបណ្ឌិត សាយ ឫទ្ធី អនុប្រធានប្រតិបត្តិក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី តំណាងឯកឧត្តម លេង ផាលី រដ្ឋលេខាធិការក្រសួងផែនការ សហប្រធានអង្កេតប្រជាសាស្ត្រ និងសុខភាពជាមួយក្រសួងសុខាភិបាល និងជាប្រធានប្រតិបត្តិក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី និងជាអនុប្រធានទី១ ក្រុមការងារថ្នាក់កណ្តាលចុះជួយស្រុកឱរ៉ាល់ ទទួលបន្ទុក៣ឃុំ សហការជាមួយឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី ឆាយ ថន ប្រធានក្រុមការងាររាជរដ្ឋាភិបាលចុះជួយខេត្តកំពង់ស្ពឺ មន្ទីរសុខាភិបាលខេត្ត ក្រុមការងារថ្នាក់កណ្តាលចុះជួយស្រុក សហភាពសហព័ន្ធយុវជនកម្ពុជាស្រុក និងអាជ្ញាធរមូលដ្ឋានស្រុកឱរ៉ាល់។
លោកវេជ្ជបណ្ឌិត សាយ រិទ្ធី បានលើកឡើងថា ការងារមនុស្សធម៌ចុះជួយប្រជាពលរដ្ឋជារៀងរហូតមក គឺកើតចេញពីការឧបត្ថម្ភគាំទ្រ និងការចង្អុលបង្ហាញពីសំណាក់ឯកឧត្តម ប្រធាន ហ៊ុន ម៉ានី ដែលលោកតែងខ្វល់ខ្វាយគិតគូរ និងរួមសុខរួមទុក្ខជាមួយប្រជាពលរដ្ឋដែលជួបការលំបាកគ្រប់កាលៈទេសៈ។
ទន្ទឹមនឹងនោះ ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានបង្រៀនបងប្អូនប្រជាពលរដ្ឋឲ្យយល់ដឹងអំពីការរស់នៅស្អាតប្រកបដោយអនាម័យល្អ ដោយលាងសម្អាតដៃនឹងអាកុល ឬសាប៊ូ ពាក់ម៉ាស់ឲ្យបានត្រឹមត្រូវនៅពេលចាំបាច់។ ក្នុងនាម ឯកឧត្តម លេង ផាលី លោកវេជ្ជបណ្ឌិត សូមអនុវត្តតាមប្រសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្រី្ត ដែលបានជម្រាបជូនបងប្អូនជនរួមជាតិ និងអំពាវនាវឲ្យប្រកាន់ខ្ជាប់នូវវិធានការ ៣ការពារ ៣កុំ ក្នុងវិធានការ ការពារCovid-19៖ ៣ការពារ ៖១-ពាក់ម៉ាស់, ២-លាងដៃ, ៣-គម្លាតសង្គម គម្លាតបុគ្គល (ចាប់ពី ១,៥ម៉ែត្រឡើងទៅ) និង៣កុំ ៖ ១-កុំចូលទៅកន្លែងបិទជិត គ្មានខ្យល់ចេញចូល និងម៉ាស៊ីនត្រជាក់ច្រើនពេក, ២-កុំទៅកន្លែងមានមនុស្សច្រើន,៣-កុំប៉ះពាល់គ្នា កុំចាប់ដៃ កុំកៀកស្មា កុំឱបគ្នាជាដើម។ សម្រាប់អ្នកដែលពាក់ព័ន្ធ នឹងអ្នកជំងឺកូវីដ-១៩ ត្រូវធ្វើចត្តាឡីស័កចំនួន១៤ថ្ងៃ អោយខាងតែបាន ដើម្បីទប់ស្កាត់នឹងការរាតត្បាតនៃវីរុសកូវីដ-១៩ ក្នុងសហគមន៍។ ទន្ទឹមនឹងនោះចំនួនអ្នកឆ្លងសម្រាប់ព្រឹត្តិការណ៍សហគមន៍ ២០កុម្ភៈ មានចំនួនជាង១ពាន់នាក់ ត្រឹមរយៈពេល១ខែ ដែលច្រើនជាង ២ដងនៃចំនួនអ្នកឆ្លងជាងមួយឆ្នាំរាប់ពីដើមឆ្នាំ២០២០មក។ ក្រៅពីនោះដំណើរការនៃចាក់វ៉ាក់សាំងបង្ការជំងឺកូវីដ-១៩ ប្រទេសកម្ពុជា ចាប់ផ្តើមចាក់វ៉ាក់សាំងកូវីដ-១៩ ស៊ីណូហ្វាម ជាជំនួយសាធារណរដ្ឋប្រជាមានិត ចិន ជូនឥស្សរជនជាន់ខ្ពស់ មន្រី្តរាជការ ក្រុមគ្រូពេទ្យជួរមុខ ចាប់តាំងពីថ្ងៃទី១០ ខែកុម្ភះ ឆ្នាំ២០២១ ព្រមទាំងកម្មករប្រមូលសំរាម ដែលមានអាយុចាប់ពី១៨ឆ្នាំឡើង រហូតដល់អាយុ៥៩ឆ្នាំ។ ហើយចាប់ផ្តើមចាក់វ៉ាក់សាំង កូវីសែល ដែលទទួលអាជ្ញាប័ណ្ណផលិតដោយក្រុមហ៊ុន អាស្ត្រាហ្សេនីកា៖ ចាប់តាំងពីថ្ងៃទី៤ ខែមីនា ឆ្នាំ២០២១ អាទិភាពចាក់ជូនថ្នាក់ដឹកនាំកំពូល និងឥស្សរជនជាន់ខ្ពស់ និងប្រជាពលរដ្ឋ អាយុចាប់ពី ៦០ឆ្នាំឡើងទៅ។ ហើយវ៉ាក់សាំងកូវ៉ាក់ ដែលកម្ពុជា បញ្ជាទិញនឹងមកដល់ឆាប់ៗ ចំនួន១លាន ៥សែនដូស និងវ៉ាក់សាំងកូវីដ-១៩ ស៊ីណូហ្វាម ដែលជាជំនួយរបស់មិត្តចិន នឹងមកដល់សម្រាប់វគ្គទី២ (បង្គ្រប់១លានដូស)ផងដែរ៕
អត្ថបទ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
