គណៈប្រតិភូយោធាអ៊ីស្រាអែលមួយក្រុម បានជួបពិភាក្សានៅទីក្រុងគែរ ជាមួយមន្ត្រីយោធាអេហ្ស៊ីប ស្តីពីការឈានទៅដំណាក់កាលទី២ នៃកិច្ចព្រមព្រៀងបទឈប់បាញ់ នៅតំបន់​ហ្កាហ្សា។​ នេះបើយោងតាមការចុះផ្សាយរបស់ប្រព័ន្ធផ្សព្វផ្សាយសាធារណៈរបស់អ៊ីស្រាអែល កាលពីថ្ងៃព្រហស្បតិ៍ (ទី៩ ខែកក្កដា ឆ្នាំ២០២៦)​។

កិច្ចប្រជុំនេះ បាន​កើត​មាន​ស្រប​នឹងដំណើរទស្សនកិច្ចរបស់គណៈប្រតិភូនៃ​ក្រុម​ហាម៉ាស ដឹកនាំដោយលោក Khalil al-Hayya ទៅកាន់រដ្ឋធានីរបស់​អេហ្ស៊ីប ដើម្បីពិភាក្សាជាមួយអន្តរការី​ ស្តីពីការពង្រឹង​បទឈប់បាញ់ និងអនាគតនៃកិច្ចព្រមព្រៀង។

ប្រព័ន្ធផ្សព្វផ្សាយអ៊ីស្រាអែល មិនបានបង្ហាញ​អត្តសញ្ញាណអ្នកចូលរួមពីភាគីណាមួយ​​ ឬពីលទ្ធផលនៃការពិភាក្សានោះទេ។ ប្រព័ន្ធផ្សព្វផ្សាយនេះ​បានឱ្យដឹង​ថា «គណៈប្រតិភូមន្ត្រីយោធាជាន់ខ្ពស់អ៊ីស្រាអែល បានទៅ​ដល់ទីក្រុងគែរ ហើយបានជួបពិភាក្សាជាមួយមន្ត្រីយោធាជាន់ខ្ពស់របស់​អេហ្ស៊ីប ក្នុងរយៈពេល ២ថ្ងៃកន្លងមកនេះ»។

យោងតាមប្រព័ន្ធផ្សព្វផ្សាយនេះ បាន​ឱ្យដឹង​ទៀតថា​ កិច្ចពិភាក្សានេះ បានធ្វើឡើងក្នុងចំណោមកិច្ចប្រឹងប្រែង ដើម្បីជំរុញទៅកាន់​ដំណាក់កាលបន្ទាប់នៃកិច្ចព្រមព្រៀងហ្កាហ្សា ក្រោមផែនការរបស់ប្រធានាធិបតីអាមេរិក លោក Donald Trump ខណៈពេលដែលអះអាងថា ក្រុម​ហាម៉ាស «នៅតែបដិសេធមិនព្រមរំសាយអាវុធ»។

គួរបញ្ជាក់​ថា ប្រទេស​អេហ្ស៊ីប កាតា និងទួរគី កំពុងសម្របសម្រួលកិច្ចខិតខំប្រឹងប្រែង ដើម្បីអនុវត្តកិច្ចព្រមព្រៀងបទឈប់បាញ់ និងជំរុញផែនការហ្កាហ្សារបស់លោក Trump៕