បាល់ទាត់៖ ក្រុមបាល់ទាត់ជម្រើសជាតិយុវជនអាយុក្រោម ២៣ឆ្នាំកម្ពុជាបានបង្ហាញបញ្ជីឈ្មោះកីឡាករ ២០នាក់ផ្លូវការសម្រាប់ចូលរួមប្រកួតកីឡាស៊ីហ្គេមលើកទី៣១ នៅប្រទេសវៀតណាមហើយ បន្ទាប់ពីធ្វើការប្រមូលផ្ដុំហ្វឹកហាត់ដំណាក់កាលទី២ រយៈពេល ១សប្ដាហ៍ពេញក្រោមការដឹកនាំរបស់លោក Keisuke Honda អ្នកចាត់ការទូទៅក្រុមជម្រើសជាតិកម្ពុជា។
កីឡាករ ២០នាក់ដែលទទួលបានកៅអីទៅប្រកួតស៊ីហ្គេមលើកនេះរួមមានកីឡាករបឹងកេត ៥នាក់ (ហ៊ុល គឹមហ៊ុយ, សៀង ចន្ធា, សឿត ណាវ៉ា, តាំង ប៊ុនឆៃ និង វ៉ាំង ដាវីន), ព្រះខ័នរាជស្វាយរៀង ៣នាក់ (មិន រតនៈ, អ៊ាន ពិសី និង ជូ ស៊ីនទិ), ភ្នំពេញក្រោន ៣នាក់ (ជួន ចាន់ចាវ, លឹម ពិសុទ្ធ និង យ៉ើ សាហ្វី), វិសាខា ៣នាក់ (វីរៈ ដារ៉ា, សារ ទី និង គី រីណា), ណាហ្គាវើលដ៏ ២នាក់ (ផា សុខម៉េង និង ផាត សុខា), គិរីវង់ ១នាក់ (អ៊ីម សំអូន), អង្គរថាយហ្គឺរ ១នាក់ (ម៉ៅ ពិសិដ្ឋ), កងយោធពលខេមរភូមិន្ទ ១នាក់ (ញាណ សុស៊ីដាន) និងព្រៃវែង ១នាក់ (ស៊ិន សុវណ្ណមករា)។ ការបង្ហាញបញ្ជីឈ្មោះកីឡាករចុងក្រោយនេះធ្វើឡើង ១ថ្ងៃមុនក្រុមជម្រើសជាតិ U23 កម្ពុជាត្រូវធ្វើដំណើរទៅទីក្រុងហាណូយដែលគ្រោងចាកចេញពីមាតុភូមិនាថ្ងៃទី០៤ ខែឧសភាស្អែកនេះតាមរយៈយន្ដហោះពិសេស ដែលរៀបចំដោយគណៈកម្មាធិការជាតិអូឡាំពិកកម្ពុជា និងសម្របសម្រួលពីរដ្ឋលេខាធិការដ្ឋានអាកាសចរណ៍ស៊ីវិល ក៏ដូចជាក្រុមហ៊ុន Cambodia Airway ដែលត្រូវធ្វើដំណើរដោយឥតគិតថ្លៃ បន្ទាប់ពីមានការផ្ដល់អនុសាសន៍ និងយកចិត្តទុកដាក់ដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជាចំពោះប្រតិភូ និងអត្តពលិកគ្រប់ប្រភេទកីឡា។
សូមបញ្ជាក់ថា សម្រាប់វិញ្ញាសាបាល់ទាត់បុរសនៃព្រឹត្តិការណ៍ស៊ីហ្គេមលើកទី៣១ នៅវៀតណាមនឹងចាប់ផ្ដើមការប្រកួតមុនប្រភេទកីឡាផ្សេងៗ ពោលគឺចាប់ផ្ដើមពីថ្ងៃទី០៦ ខែឧសភាតទៅមុនពិធីបើកនាថ្ងៃទី១២ ខែឧសភាដោយក្រុម U23 កម្ពុជាស្ថិតក្នុងពូល B ជាមួយថៃ ម៉ាឡេស៊ី សិង្ហបុរី និងឡាវ។ ចំពោះកម្មវិធីប្រកួតរបស់ក្រុមគោព្រៃជំទង់កម្ពុជារួមមានថ្ងៃទី០៩-ឧសភា កម្ពុជាត្រូវជួបក្រុម U23 ឡាវនាវេលាម៉ោង ៤ល្ងាច, ថ្ងៃទី១១-ឧសភា កម្ពុជាត្រូវជួបក្រុម U23 សិង្ហបុរីនាវេលាម៉ោង ៤ល្ងាច, ថ្ងៃទី១៤-ឧសភា កម្ពុជាត្រូវជួបក្រុម U23 ថៃនាវេលាម៉ោង ៧យប់ និងថ្ងៃទី១៦-ឧសភា កម្ពុជាត្រូវជួបក្រុម U23 ម៉ាឡេស៊ីនាវេលាម៉ោង ៤ល្ងាច៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
