ស៊ីហ្គេម៖ ដោយមានការយកចិត្ដទុកដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា គណៈប្រតិភូ និងអត្តពលិកកីឡាកម្ពុជានឹងធ្វើដំណើរតាមយន្ដហោះពិសេស ទៅចូលរួមប្រកួតកីឡាស៊ីហ្គេមលើកទី៣១ នៅប្រទេសវៀតណាមដោយឥតគិតថ្លៃតាមរយៈក្រុមហ៊ុន Cambodian Airway។ នេះបើយោងតាមសេចក្ដីជូនដំណឹងរបស់គណៈកម្មាធិការជាតិអូឡាំពិកកម្ពុជា (NOCC) នៅថ្ងៃទី០២ ខែឧសភា ឆ្នាំ២០២២។
គណៈកម្មាធិការជាតិអូឡាំពិកកម្ពុជាបានជូនដំណឹងដល់ប្រតិភូកីឡាកម្ពុជាថា ក្រោយទទួលបានការយកចិត្តទុកដាក់ដ៏ខ្ពង់ខ្ពស់ និងជាពិសេសពីសម្ដេចតេជោនាយករដ្ឋមន្ដ្រី ដល់ការធ្វើដំណើររបស់ប្រិតភូកីឡាកម្ពុជាចូលរួមប្រកួតកីឡាស៊ីហ្គេមនៅទីក្រុងហាណូយ និងតាមការសម្របសម្រួលពីរដ្ឋលេខាធិការដ្ឋានអាកាសចរណ៍ស៊ីវិល ក្រុមហ៊ុន Cambodia Airway បានផ្ដល់យន្ដហោះពិសេសដឹកជញ្ជូនប្រតិភូកីឡាទាំងទៅទាំងមកដោយឥតគិតថ្លៃ។ សេចក្ដីជូនដំណឹងដដែលបានបញ្ជាក់ថា ស៊ីហ្គេមនៅវៀតណាមលើកនេះដោយហេតុផលនៃការទប់ស្កាត់ និងកាត់បន្ថយការឆ្លងជំងឺកូវីដ-១៩ ដែលមិនទាន់ផុតរលត់នៅឡើយ គណៈកម្មាធិការជាតិអូឡាំពិកកម្ពុជាក៏ដូចជាក្រសួងអប់រំ យុវជន និងកីឡា បានជួបការលំបាកក្នុងការរៀបចំធ្វើដំណើរ ដោយសារក្នុងព្រឹត្តិការណ៍លើកនេះម្ចាស់ផ្ទះបានកំណត់ពេលវេលាសម្រាប់ការទៅដល់ខុសៗគ្នា តាមប្រភេទកីឡាដោយត្រូវទៅដល់មុន ២ថ្ងៃ និងត្រឡប់មកវិញមួយថ្ងៃក្រោយចប់ការប្រកួត ដែលពិបាករកកៅអីឲ្យគ្រប់តាមជើងហោះហើរនីមួយៗ និងពិបាកក្នុងឈប់សំចតច្រើនតាមផ្លូវជាដើម ដែលធ្វើឲ្យកីឡាករចុះខ្សោយកម្លាំង ថាមពលមួយចំនួន។ ប៉ុន្ដែពេលនេះសម្ដេចតេជោ ហ៊ុន សែន បានផ្ដល់នូវការយកចិត្តទុកដាក់ខ្ពស់ដោះស្រាយការលំបាកនេះ ដោយរៀបចំធ្វើដំណើរតាមយន្ដហោះពិសេស “Charter Flight” តែម្ដង ហើយការធ្វើដំណើរចូលព្រលានយន្ដហោះអន្ដរជាតិភ្នំពេញ ដោយប្រើប្រាស់ច្រក VIP ទាំងអស់ទៀតផង។
ក្នុងនាមប្រធានប្រតិភូ និងកីឡាករ កីឡាការិនី គណៈកម្មាធិការជាតិអូឡាំពិកកម្ពុជា ដែលមានឯកឧត្តមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ជាប្រធានបានបង្ហាញនូវក្ដីរំភើប សប្បាយរីករាយ និងកក់ក្ដៅជាទីបំផុតដែលបានទទួលការធ្វើដំណើរប្រកបដោយផាសុខភាព រក្សាបានសុខភាពផ្លូវកាយ និងចិត្ត ឆ្ពោះទៅការប្រកួតប្រជែងប្រកបដោយប្រសិទ្ធភាព គុណផលកីឡា ដើម្បីដណ្ដើមជ័យលាភីជូនជាតិឲ្យបានច្រើនជាងលើកមុនៗ។ សូមបញ្ជាក់ថា ស៊ីហ្គេមលើកទី៣១ នៅវៀតណាមដែលត្រូវបានពន្យារពេលមកពីចុងឆ្នាំ២០២១ នឹងត្រូវរៀបចំការប្រកួតផ្លូវការពីថ្ងៃទី១២-២៣ ខែឧសភា ឆ្នាំ២០២២ ខាងមុខ ជាមួយការកំណត់កីឡាចំនួន ៤០ប្រភេទដាក់ក្នុងការប្រកួតស្មើនឹង ៥២៦វិញ្ញាសា ហើយមានកីឡាករ-កីឡាការិនីចូលរួមសរុប ៧,១១៥នាក់ ក្នុងនោះកម្ពុជាត្រូវបញ្ជូនប្រតិភូ និងអត្តពលិកសរុប ៥៦០នាក់ទៅចូលរួម ដែលរួមមានថ្នាក់ដឹកនាំ និងមន្ត្រីកីឡាចំនួន ៤៥នាក់, កីឡាករ-កីឡាការិនីចំនួន ៣៦៣នាក់, គ្រូបង្វឹក-គ្រូជំនួយចំនួន ៩៣នាក់, អាជ្ញាកណ្ដាលចៅក្រមអន្តរជាតិចំនួន ១៦នាក់, អ្នកដឹកនាំក្រុមចំនួន ២២នាក់ និងក្រុមគ្រូពេទ្យចំនួន ២១នាក់៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
