ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ (OCHA) កាលពីថ្ងៃអាទិត្យ (ទី១២ ខែកក្កដា ឆ្នាំ២០២៦) បានព្រមានថា ការវាយប្រហារដោយយានដ្រូន​ជាបន្តបន្ទាប់ កំពុងធ្វើឱ្យវិបត្តិមនុស្សធម៌រឹត​តែ​ធ្ងន់ធ្ងរ នៅក្នុងតំបន់ Kordofan របស់​ប្រទេសស៊ូដង់ ជាកន្លែងដែលការផ្ទុះឡើងនៃជំងឺអាសន្នរោគមាន​សភាព​កាន់តែអាក្រក់ទៅៗ និងការខ្វះខាតទឹកធ្ងន់ធ្ងរ កំពុងធ្វើឱ្យជនស៊ីវិលរងទុក្ខវេទនាកាន់តែខ្លាំងឡើង។

យោងតាម ​​OCHA បាន​ឱ្យដឹង​ថា ប្រភពក្នុងស្រុក បានរាយការណ៍ថា ការវាយប្រហារដោយយានដ្រូន បានកំណត់គោលដៅលើយានយន្តស៊ីវិល ១គ្រឿង នៅជិតភូមិ Al-Shaatut ភាគខាងកើតទីក្រុង​​ Jabrat Al-Sheikh ក្នុងតំបន់ North Kordofan កាលពីថ្ងៃចន្ទសប្តាហ៍មុន ដែលបណ្តាលឱ្យជនស៊ីវិលស្លាប់ និង​របួស និងបង្កជា​ការ​ខូចខាត។ នៅថ្ងៃបន្ទាប់ យានដ្រូន​មួយគ្រឿង​ផ្សេងទៀត ត្រូវបានគេរាយការណ៍ថា បានវាយប្រហាររថយន្តដឹកទឹក ១គ្រឿង នៅទីក្រុង​ Hamrat Al-Sheikh ដែលបណ្តាលឱ្យជនស៊ីវិលស្លាប់ និង​របួស និងរំខានបន្ថែមទៀតដល់លទ្ធភាព​ទទួលបានការផ្គត់ផ្គង់ទឹក​សំខាន់ៗ។

ជាមួយ​គ្នានេះ OCHA បានឱ្យដឹង​ទៀត​ថា ជំងឺអាសន្នរោគនៅតែបន្តរាលដាលពាសពេញតំបន់​ Kordofan ដោយដៃគូមនុស្សធម៌ បានរាយការណ៍ពីករណីសង្ស័យ នៅទីក្រុង​ El Obeid ជាកន្លែងដែលការវាយប្រហារដោយយានដ្រូនជាបន្តបន្ទាប់ បានកាត់បន្ថយការផ្គត់ផ្គង់ទឹករបស់ទីក្រុងមកត្រឹម ២០ភាគរយនៃតម្រូវការ។

ជាងមួយខែមកនេះ​ ទីក្រុង El Obeid បានស្ថិតនៅក្រោមការវាយប្រហារដោយយានដ្រូន​ពី​កងកម្លាំងគាំទ្ររហ័ស (RSF) ដោយកំណត់គោលដៅរោងចក្រថាមពលសំខាន់របស់ទីក្រុង កន្លែងផលិតប្រេងឥន្ធនៈ និងទីតាំងស៊ីវិលផ្សេងទៀត ដោយបានបណ្ដាល​ឱ្យមាន​អ្នក​ស្លាប់​ និងរបួសរាប់សិបនាក់៕