ទីភ្នាក់ងារសារព័ត៌មាន Yonhap បានរាយការណ៍ថា ប្រធានាធិបតីដែលត្រូវបានបណ្តេញចេញពីតំណែងរបស់កូរ៉េខាងត្បូង គឺ​លោក Yoon Suk Yeol ត្រូវបានកាត់ទោសឱ្យជាប់ពន្ធនាគាររយៈពេល ២ឆ្នាំ នៅ​ថ្ងៃចន្ទ (ទី១៣ ខែកក្កដា ឆ្នាំ២០២៦) នេះ ក្នុងករណីមូលនិធិនយោបាយ។

យោងតាមទីភ្នាក់ងារសារព័ត៌មាននេះ បាន​ឱ្យ​ដឹង​ថា តុលាការទីក្រុងសេអ៊ូល បានរកឃើញថា លោក Yoon មានទោសពីបទទទួលយក​សេវាកម្មស្ទង់មតិដោយឥតគិតថ្លៃ ដែលមានតម្លៃ ១៨៩.១០០ដុល្លារ ពី «ឈ្មួញកណ្តាលដ៏មាន​ឥទ្ធិពល​ស្វ័យ​ប្រកាស» គឺ​លោក​​ Myung Tae-kyun រវាងខែមេសា ឆ្នាំ២០២១ និងខែមីនា ឆ្នាំ២០២២។ របាយការណ៍បានបញ្ជាក់​ថា មូលនិធិទាំងនោះត្រូវបានទទួលក្នុងទម្រង់ជាការស្ទង់មតិដោយឥតគិតថ្លៃ។

លោក Yoon ត្រូវបានបោះឆ្នោត​ជ្រើសរើសជាប្រធានាធិបតី ក្នុងនាម​ជាបេក្ខជន​របស់​គណបក្សអំណាចប្រជាជន (People Power Party) ប៉ុន្តែត្រូវបានដកចេញពីតំណែងកាលពីឆ្នាំមុន បន្ទាប់ពីបាន​ប៉ុនប៉ងមិន​ជោគ​ជ័យ ក្នុង​ការ​ដាក់ចេញ​ច្បាប់អាជ្ញាសឹក ក្នុងខែធ្នូ ឆ្នាំ២០២៤។

លោកត្រូវបានឃុំខ្លួនចាប់តាំងពីខែកក្កដាឆ្នាំមុន ហើយប្រឈមមុខ​នឹងការ​ចោទ​ប្រកាន់យ៉ាងហោចណាស់ ៨ករណី ទាក់ទងនឹងការប៉ុនប៉ងចេញ​ច្បាប់អាជ្ញាសឹកមិន​ជោគ​ជ័យនោះ​​។

កាលពីខែមិថុនា ឆ្នាំមុន តុលាការទីក្រុងសេអ៊ូលបានកាត់ទោសលោក Yoon ឱ្យជាប់ពន្ធនាគាររយៈពេល ៣០​ឆ្នាំ បន្ទាប់ពីរកឃើញថា រូប​លោក​មានទោសពីបទរំលោភអំណាច និងជួយគូ​សត្រូវ ដោយបាន​បញ្ជូនយានដ្រូន​ទៅ​រដ្ឋធានីព្យុងយ៉ាងរបស់កូរ៉េខាងជើង ក្នុងឆ្នាំ២០២៤៕