លោកប្រធានាធិបតី Donald Trump បាននិយាយនៅ​ថ្ងៃចន្ទ (ទី១៣ ខែកក្កដា ឆ្នាំ២០២៦) នេះ​ថា សហរដ្ឋអាមេរិក អាច​នឹងកាន់កាប់​ច្រកសមុទ្រ Hormuz ហើយគួរតែត្រូវបានប្រាក់កម្រៃ​ត្រឡប់​វិញ សម្រាប់ការគ្រប់គ្រងផ្លូវទឹកដ៏សំខាន់នេះ។

នៅក្នុងបទសម្ភាសន៍តាមទូរស័ព្ទ ជាមួយ​កម្មវិធី «Fox & Friends» របស់ប្រព័ន្ធ​ផ្សព្វផ្សាយ​ Fox News លោក Trump បាននិយាយ​ថា៖ «យើងនឹងបន្ត​រក្សាច្រកសមុទ្រនេះ ហើយយើងប្រហែលជានឹងគ្រប់គ្រងវា។ យើងនឹងក្លាយជាអ្នកការពារច្រកសមុទ្រនេះ​។ ប្រហែលជាយើងនឹងហៅវាថា ជាទេវតាការពារច្រកសមុទ្រនេះ​។ ហើយយើងគួរតែទទួល​បាន​ប្រាក់ត្រឡប់​វិញ សម្រាប់​ការ​ថែរក្សា​នោះ»។

ការគ្រប់គ្រងច្រកសមុទ្រ Hormuz ដែលជាផ្លូវសំខាន់សម្រាប់ការផ្គត់ផ្គង់ប្រេងសកល បានក្លាយជាសមរភូមិសំខាន់នៃជម្លោះនេះ​។ ការបិទច្រកសមុទ្រដ៏មានប្រសិទ្ធភាពរបស់អ៊ីរ៉ង់ បានជំរុញឱ្យតម្លៃថាមពលហក់​ឡើង និងបង្កើនក្ដី​បារម្ភ អំពីអតិផរណា នៅទូទាំងពិភពលោក។

អំឡុង​កិច្ចសម្ភាសន៍នោះ លោក Trump បានបញ្ជាក់​ថា៖ «យើងនឹងការពារវា។ យើងនឹងទទួលបានប្រាក់កម្រៃ សម្រាប់ការការពារវា ដែល​ជា​ប្រាក់ដ៏​ច្រើន។ យើងនឹងទទួលបានសំណងវិញ ពីព្រោះប្រទេសដទៃទៀតមានទ្រព្យសម្បត្តិច្រើន។ ពួកគេនៅខាងយើង ហើយយើងមិនអាចរំពឹងធ្វើបែបនោះដោយឥតទទួល​បាន​ប្រយោជន៍ឡើយ​»។

កងកម្លាំងឆ្មាំបដិវត្តន៍អ៊ីរ៉ង់បានឱ្យដឹង​នៅក្នុងសេចក្តីថ្លែងការណ៍នៅ​ថ្ងៃចន្ទនេះ​ថា មធ្យោបាយតែមួយគត់ ដើម្បីស្តារចរាចរណ៍ដឹកជញ្ជូនធម្មតាឡើង​វិញ តាមរយៈច្រកសមុទ្រនេះ គឺការបញ្ចប់អន្តរាគមន៍យោធារបស់សហរដ្ឋអាមេរិក នៅក្នុងផ្លូវទឹកនេះ​ ហើយបានព្រមានថា «ការជ្រៀតជ្រែកជាបន្តបន្ទាប់អាចនាំឱ្យមានឧប្បត្តិហេតុកាន់តែធំ នៅក្នុងវិស័យប្រេង និងឧស្ម័នសកល»៕