យោធាអ៊ីរ៉ង់បាននិយាយកាលពីថ្ងៃចន្ទ ១៣កក្កដាសប្ដាហ៍នេះថា ខ្លួននឹងមិនអនុញ្ញាតឱ្យសហរដ្ឋអាមេរិកជ្រៀតជ្រែកក្នុងការគ្រប់គ្រងច្រកសមុទ្រហ័រមូស «ក្នុងកាលៈទេសៈណាក៏ដោយ» ដែលជាការឆ្លើយតបយ៉ាងម៉ឺងម៉ាត់ទៅកាន់សម្ដីរបស់ប្រធានាធិបតីអាមេរិក Donald Trump ដែលថាទីក្រុងវ៉ាស៊ីនតោននឹង «កាន់កាប់» ផ្លូវទឹកយុទ្ធសាស្ត្រនេះ។

យោងតាមទីភ្នាក់ងារសារព័ត៌មានអ៊ីរ៉ង់ Tasnim អ្នកនាំពាក្យមួយរូបរបស់ទីស្នាក់ការកណ្តាល Khatam al-Anbiya របស់អ៊ីរ៉ង់បាននិយាយថា «បន្ទាប់ពីការព្រមាន ពួកលោកនឹងមិនអនុញ្ញាតឱ្យសហរដ្ឋអាមេរិកជ្រៀតជ្រែកក្នុងការគ្រប់គ្រងច្រកសមុទ្រហ័រមូសទេ» ។

អ្នកនាំពាក្យរូបនេះបាននិយាយថា កងកម្លាំងប្រដាប់អាវុធអ៊ីរ៉ង់នឹង «ដោះស្រាយយ៉ាងម៉ឺងម៉ាត់លើការរំខាន ឬអសន្តិសុខណាមួយ» ចំពោះការឆ្លងកាត់នាវាពាណិជ្ជកម្ម និងនាវាដឹកប្រេងដោយយោធាអាមេរិក «នៅខាងក្រៅផ្លូវដែលបានកំណត់របស់អ៊ីរ៉ង់ និងដោយគ្មានការអនុញ្ញាតពីកងកម្លាំងប្រដាប់អាវុធ» ដោយលើកឡើងពីសកម្មភាពថ្មីៗរបស់ឆ្មាំបដិវត្តន៍អ៊ីរ៉ង់ និងកងកម្លាំងប្រដាប់អាវុធជាភស្តុតាងនៃការដោះស្រាយនោះ។

អ្នកនាំពាក្យរូបនេះបាននិយាយថា ការទទួលខុសត្រូវចំពោះ «ភាពអសន្តិសុខទាំងអស់ និងការពង្រីកសង្គ្រាមនៅក្នុងតំបន់» គឺស្ថិតនៅលើសហរដ្ឋអាមេរិក និងប្រទេសដែលសហការជាមួយអ្វីដែលលោកបានពិពណ៌នាថាជា «កងទ័ពឧក្រិដ្ឋជន» របស់ខ្លួន។

អ្នកនាំពាក្យយោធាអ៊ីរ៉ង់ខាងលើបានព្រមានប្រមុខរដ្ឋក្នុងតំបន់ថា កិច្ចសហប្រតិបត្តិការណាមួយជាមួយយោធាសហរដ្ឋអាមេរិក រួមទាំងការគាំទ្រផ្នែកភស្តុភារ «នឹងត្រូវបានចាត់ទុកថាជាទង្វើសង្គ្រាមប្រឆាំងនឹងអធិបតេយ្យភាព និងសន្តិសុខជាតិរបស់អ៊ីរ៉ង់»៕