ភ្នំពេញ៖ ការិយាល័យទីភ្នាក់ងារUN Women បានសម្រេចថា នឹងផ្តល់ជំនួយតាមរយៈ Elsie Initiative Fund ដើម្បីសិក្សាស្រាវជ្រាវកំណត់កត្តាប្រឈមការបញ្ជូនទ័ពមួកខៀវស្ត្រីកម្ពុជា ចូលរួមប្រតិបត្តិការរក្សាសន្តិភាពរបស់ UN នៅតាមបណ្តាប្រទេសកំពុងមានជម្លោះសង្គ្រាម។

នាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិរក្សាសន្តិភាព បាន​ថ្លែង​ប្រាប់​BTVនៅថ្ងៃទី៣ ខែឧសភានេះថា ការិយាល័យទីភ្នាក់ងារសហប្រជាជាជាតិ UN Women ប្រចាំ​នៅ​កម្ពុជា បានសម្រេចនឹងសម្របសម្រួលការផ្តល់ជំនួយអនុវត្តគម្រោង វាស់វែង​ឱកាស​សម្រាប់​ស្ត្រី​នៅក្នុងប្រតិបត្តិការរក្សាសន្តិភាព (MOWIP) តាម​រយៈការជ្រើសរើស​យក​វិទ្យា​ស្ថាន​ស្រាវជ្រាវ​ឯករាជ្យមួយ ​ដើម្បីធ្វើការប៉ាន់ប្រមាណកត្តាប្រឈម ​និង​កត្តា​រារាំង​របស់ស្ត្រីកម្ពុជា ហើយ​នឹង​ចងក្រង​បង្កើតឡើង ដោយមជ្ឈមណ្ឌលសម្រាប់អភិបាលកិច្ចវិស័យសន្តិសុខនៅទីក្រុងហ្សឺណែវ (DCAF) ដើម្បីការគាំទ្រកិច្ចខិតខំប្រឹងប្រែងរបស់កម្ពុជា ​និងបង្កើនការចូលរួមរបស់ស្ត្រីប្រកបដោយ​អត្ថន័យ​នៅក្នុងប្រតិបត្តិការរក្សាសន្តិភាពUN។

គម្រោងនេះ នឹងបង្ហាញភាពជាអ្នកដឹកនាំរបស់ប្រមុខថ្នាក់ដឹក​នាំ​រាជរដ្ឋាភិបាល​កម្ពុជា​នៅក្នុងស្មារតី​ប្ដេជ្ញាចិត្តចូលរួមថែរក្សាសន្តិភាពអន្តរជាតិ ​សម្រេច​បានតាមគោលដៅ ​ស្របពេលដែលកម្ពុជា កំពុង​ដើរតួនាទី និងអាទិភាពរបស់កម្ពុជា​ ក្នុងនាមជាប្រធានអាស៊ាន នៅក្នុងឆ្នាំ២០២២ ដែលផ្ដោត​លើការ​ពន្លឿនរបៀបវារៈស្តីពីស្ត្រីសន្តិភាព​ និង​សន្តិសុខនៅក្នុងអាស៊ាន។

លោកស្រី Sarah Knibbs មានជំនឿថា គម្រោងនឹងធ្វើឱ្យមានការសាយភាយ​លទ្ធផលជាវិជ្ជមានផង​ដែរ​នៅក្នុងតំបន់អាស៊ាន និងសង្ឃឹមថា​គម្រោងជំរុញលើកទឹកចិត្តដល់បណ្តាសមាជិកអាស៊ាន​ផ្សេងទៀតផងដែរ។

នាយឧត្តមសេនីយ៍ សែម សុវណ្ណនី បានបញ្ជាក់ថា ​មូលនិធិ Elsie Initiative (EIF) បង្កើត​ឡើង​ដោយUN និងរដ្ឋាភិបាលប្រទេសកាណាដានៅក្នុងឆ្នាំ ២០១៩ ហើយមូលនិធិ ​គឺមាន​លក្ខណៈ​ច្នៃប្រឌិត ​ជាមូលនិធិពហុភាគី ​ដែលមានគោលបំណងបង្កើនល្បឿន វឌ្ឍនភាព​ឆ្ពោះទៅ​ទទួល​គោលដៅសូចនាករយេនឌ័រ ​ស្របជាមួយសេចក្ដីសម្រេចរបស់ក្រុម​ ប្រឹក្សាសន្តិសុខUN និង​យុទ្ធសាស្ត្រកាត់បន្ថយគម្លាតយេនឌ័រ​នៅក្នុងកងកម្លាំង របស់UNឆ្នាំ​ ២០១៨ ២០២៨។

ឯកឧត្តម បន្តថា បច្ចុប្បន្នកម្ពុជា គឺស្ថិតនៅក្នុងលំដាប់ប្រទេសទី២៥ បានបញ្ជូនកងកម្លាំង​ចូលរួម​ច្រើនជាងគេនៅក្នុងការរក្សាសន្តិភាពរបស់ UN ​ហើយនាពេលបច្ចុប្បន្នកម្ពុជា​ មានកងមួកខៀវ ៧៦៦រូបមានស្ត្រី១៤% កំពុងឈរជើងបំពេញបេសកកម្មរក្សាសន្តិភាពតាមប្រទេសចំនួន៤រួមមាន ស៊ូដង់ខាងត្បូង ​លីបង់ ម៉ាលី ​និងសាធារណរដ្ឋអាហ្វ្រឹកកណ្តាល ៕