ភ្នំពេញ៖ នៅថ្ងៃនេះ ឯកឧត្តម ឧបនាយករដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ បានអញ្ជើញសម្ពោធ «ផ្ទះបាយអង្គរ» ក្នុងគោលបំណងទាក់ទាញភ្ញៀវបរទេសឲ្យបានស្គាល់ពីម្ហូបប្រពៃណីខ្មែរ។

នៅថ្ងៃទី៣ ខែឧសភា ឆ្នាំ២០២២ ក្នុងពិធីសម្ពោធ “ផ្ទះបាយអង្គរ” ដោយមានការចូលរួមពីថ្នាក់ដឹកនាំក្រសួង និងភរិយាឯកអគ្គរដ្ឋ/រាជទូតនៃបណ្តាប្រទេសអាស៊ាន ក៏ដូចជាភរិយា ឯកអគ្គរដ្ឋ / រាជទូតនៃប្រទេសដៃគូអាស៊ាន​ដែលជាសមាជិកានៃ​សមាគមនារីអាស៊ាន ឯកឧត្តម ឧបនាយករដ្ឋមន្រ្តី ប្រាក់ សុខុន មានប្រសាសន៍ថា ការបង្កើត “ផ្ទះបាយអង្គរ” គឺជាការកែទម្រង់ផ្ទៃក្នុង ដែលជាផ្នែកមួយនៃការទូតអាហារ ដែលមានចែងនៅ​ក្នុងយុទ្ធសាស្រ្តការទូតសេដ្ឋកិច្ច២០២១-២០២៣ របស់ក្រសួង ព្រមទាំងទទួលបាន ការគាំទ្រ​ទាំងស្រុងពីសម្តេចតេជោ ហ៊ុន សែន នាយករដ្ឋមន្រ្តី។

ឯកឧត្តម ឧបនាយករដ្ឋមន្រ្តី ប្រាក់ សុខុន ថ្លែងថា ក្នុងសម័យរបបប្រល័យពូជសាសន៍ ប៉ុល ពត ប្រជាជនគ្មានអាហារគ្រប់គ្រាន់ ដើម្បីទទួលទាន លើកលែងតែអង្គការចាត់តាំងហៅតែប៉ុណ្ណោះ ដូច្នេះពិធីសម្ពោធ ផ្ទះបាយអង្គរ នាពេលនេះកម្ពុជាចង់បណ្តាទូត និងប្រទេសជាដៃអាស៊ាន​ចូលរួម​ពិសាររួមគ្នា ដោយក្តីសប្បាយរីករាយ។

ឯកឧត្តម ឧបនាយករដ្ឋមន្រ្តី ប្រាក់ សុខុន បន្តថា ផ្ទះបាយអង្គរ នឹងមានការបណ្តុះបណ្តាលនឹងជួយ​ដល់​អ្នកជំនាញក្នុងវិស័យម្ហូបអាហារបានរៀនសូត្រ និងស្វែងយល់បន្ថែមអំពីការ​ចម្អិនម្ហូប​ប្រពៃណីរបស់ខ្មែរសម្រាប់ជូនភ្ញៀវបរទេសពិសារ និងបានស្គាល់ពីរសជាតិម្ហូបនីមួយៗ។

“ផ្ទះបាយអង្គរ” នេះត្រូវបានរៀបចំឡើង ក្រោមហេតុផលចំបងចំនួន៣គឺ ទី១ សៀវភៅមុខម្ហូប រសជាតិអង្គរ របស់ក្រសួងការបរទេសបានទទួលជ័យ លាភីជា “សៀវភៅមុខម្ហូបអាស៊ីដែលល្អផ្តាច់​គេនៅក្នុងការប្រកួត Gourmand World Cookbook Awards ប្រចាំឆ្នាំ២០២១ នៅទីក្រុងបារីស។ សៀវភៅនេះមានរូបមន្តធ្វើម្ហូប និង បង្អែម ខ្មែរ ចំនួន៣៨មុខ ដែលលម្អិត និងងាយស្រួលធ្វើតាម។ អាស្រ័យហេតុនេះ ក្រសួងនឹងប្រើប្រាស់សៀវភៅនេះជា ឧបករណ៍ គន្លឹះដើម្បីលើកស្ទួយ​និង​ផ្សព្វផ្សាយវិស័យការទូតអាហាររបស់យើង ​តាមរយៈមិត្តភក្តិបរទេសនៅ ទូទាំង​ ពិភពលោក ជាឧទាហរណ៍មិត្តភក្តិអាស៊ានរបស់យើងនៅក្នុងថ្ងៃនេះ។

ទី២ ក្រសួងការបរទេសតាមរយៈវិទ្យាស្ថានជាតិការទូតនិងទំនាក់ទំនងអន្តរជាតិ គ្រោងនឹងរៀបចំ​កម្មវិធីបណ្តុះ- បណ្តាលស្តីពី “ការទូតអាហារ” ដល់មន្រ្តីការទូតកម្ពុជាជាពិសេសភរិយា​ឯកអគ្គ​រាជទូត ដើម្បីពង្រឹងសមត្ថភាព ពួកគាត់ឱ្យស្វែងយល់ពីមូលដ្ឋានគ្រឹះនៃរូបមន្តនិងវិធីចម្អិនម្ហូបខ្មែរ ដើម្បីពន្យល់ពីប្រវត្តិម្ហូបខ្មែរ ​រាប់ពាន់ឆ្នាំនេះ និងលើកស្ទួយ អត្តសញ្ញាណជាតិខ្មែរដល់មិត្តភក្តិ​បរទេស និងទី៣ ​បន្ទាប់ពីម្ហូបខ្មែរត្រូវបានទទួលស្គាល់និងមានភាពល្បីល្បាញ​ កម្ពុជាជឿជាក់ថា នឹង​មា​នឱកាសវិនិយោគលើវិស័យផ្សេងៗដូចជា ​ឧស្សាហកម្មទេសចរណ៍​ ឧស្សាហកម្មអាកាសចរណ៍ ផលិតផលកសិកម្ម ​និងការពង្រីកចំនួនភោជនីយដ្ឋាន និងសណ្ឋាគារជាដើម ខណៈនេះនឹង​រួមចំណែកក្នុងកិច្ចខិតខំ ប្រឹងប្រែងរបស់រាជរដ្ឋាភិបាល ក្នុងការប្រែក្លាយកម្ពុជាទៅជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានប្រាក់ចំណូលកម្រិតខ្ពស់នៅឆ្នាំ២០៥០៕