ទិន្នន័យផ្លូវការបង្ហាញថា បណ្តាប្រទេសនៅអឺរ៉ុប រាយការណ៍ករណីស្លាប់មនុស្សជាង ១ម៉ឺននាក់ អំឡុងរលកកម្តៅបំបែកកំណត់ត្រា ដែលបានហ៊ុមព័ទ្ធតំបន់ភាគខាងលិចទ្វីបមួយនេះ កាលពីចុងខែមិថុនា ឆ្នាំ ២០២៦ ។

ភាគច្រើននៃមនុស្សស្លាប់ជាង ៩ពាន់នាក់ ស្ថិតក្នុងចំណោមមនុស្សដែលមានអាយុចន្លោះ ៦៥ឆ្នាំ និងអាយុច្រើនលើសនេះ ។ នេះបើយោងតាមទិន្នន័យចេញផ្សាយដោយ EuroMOMO គឺជាបណ្តាញមួយដែលគាំទ្រដោយមន្ទីរគ្រប់គ្រង និងបង្ការជំងឺអឺរ៉ុប និងអង្គការសុខភាពពិភពលោក(WHO) ។

អាកាសធាតុក្តៅអាចសម្លាប់មនុស្សបាន តាមរយៈការបង្កឲ្យមានសុរិយរោគ ឬធ្វើឲ្យជំងឺសរសៃឈាមបេះដូង និងជំងឺផ្លូវដង្ហើម កាន់តែធ្ងន់ធ្ងរឡើង នៅក្នុងចំណោមមនុស្សចាស់ដែលងាយរងគ្រោះខ្លាំងបំផុត ។

លោក Lasse Vestergaard គឺជាគ្រូពេទ្យនៅវិទ្យាស្ថានជាតិសេរ៉ូមរបស់ដាណឺម៉ាកដែលបណ្តាញ EuroMOMO ស្ថិតនៅ និយាយប្រាប់ទីភ្នាក់ងារព័ត៌មានរ៉យទ័រថា អាកាសធាតុក្តៅបែបនេះ អំឡុងចុងខែមិថុនា មិនមែនជារឿងធម្មតានោះទេ វាពិតជាក្តៅខ្លាំងណាស់ ។

ក្រុមអ្នកវិទ្យាសាស្រ្តនិយាយថា រលកកម្តៅចុងខែមិថុនា នឹងមិនកើតឡើងនោះទេ បើសិនជាគ្មានបម្រែបម្រួលអាកាសធាតុបង្កឡើងដោយសារមនុស្ស ដែលធ្វើឲ្យស្ថានភាពក្តៅខ្លាំង កើតឡើងកាន់តែញឹកញាប់ជាងមុន និងកាន់តែខ្លាំងក្លាជាងមុន ៕