ភ្នំពេញ៖ វិស័យសង្គមកិច្ច អតីតយុទ្ធជន និងយុវនីតិសម្បទា កំពុងបោះជំហ៊ានទៅមុខ និងសម្រេចបានសមិទ្ធផលជាច្រើន។ នេះជាការលើកឡើងរបស់ ឯកឧត្តម វង សូត រដ្ឋមន្រ្តីក្រសួងសង្គមកិច្ច ក្នុងឱកាសប្រារព្ធពិធីអបអរសាទរ ទិវាសង្គមកិច្ចពិភពលោកឆ្នាំ២០២២។

ក្រសួងសង្គមកិច្ច រួមទាំងអង្គការជាដៃគូនៅថ្ងៃនេះ បានរៀបចំនូវការអបអរសាទរ ទិវា​សង្គមកិច្ច​ពិភព​លោក​ឆ្នាំ២០២២ ក្រោមប្រធានបទ «រួមគ្នា​កសាងពិភពលោកមួយប្រកបដោយបរិស្ថាន​សង្គមថ្មី ​និង​គ្មានអ្នកណាម្នាក់ត្រូវបានទុកចោល»។

ក្នុងឱកាសទិវានេះ ឯកឧត្តម វង សូត រដ្ឋមន្រ្តី ក្រសួងសង្គមកិច្ច លើកឡើងថា វិស័យសង្គមកិច្ច អតីតយុទ្ធជន និងយុវនីតិសម្បទា បាននឹងកំពុងបោះជំហានទៅមុខ និង ​ទទួល​បាន​នូវ​សមិទ្ធផល​ថ្មីៗជាច្រើន​ តាមរយៈការអនុវត្តគោលនយោបាយ ​កម្មវិធីជាតិជាពិសេស ក្របខ័ណ្ឌគោល​នយោបាយ​ជាតិ​គាំពារ​សង្គម សំដៅបង្កើតនូវសេវាសាធារណៈ ​ដើម្បីជួយដល់ជនរងគ្រោះ និង​ក្រុមជនងាយរងគ្រោះក្នុងសង្គម ​និងការបង្កើតរបបសន្តិសុខ​សង្គមសម្រាប់អតីតមន្រ្តីរាជការស៊ីវិល អតីតយុទ្ធជន​ និងជំនួយសង្គមសម្រាប់ប្រជាពលរដ្ឋ។

សមិទ្ធផលទាំងនោះ មាន​ដូចជាការបង្កើតច្បាប់ស្តីពីយុត្តិធម៌អនីតិជន​ ការរៀបចំគោលនយោបាយ​ជាតិ​ស្តីពីមនុស្សវ័យចាស់ឆ្នាំ២០១៧-២០៣០ ការរៀបចំគោលនយោបាយចំពោះជនពិការក្រីក្រ​តាម​សហគមន៍ ការបង្កើត​មជ្ឈមណ្ឌលថែទាំ ​និងស្តារនីតិសម្បទាជនវិបល្លាសស្មារតី ការ​បង្កើត​មជ្ឈមណ្ឌល​សំចតប៉ោយប៉ែត ​ការអនុវត្តកម្មវិធី​ឧបត្ថម្ភ​សាច់ប្រាក់​ជូនស្រ្តីមានផ្ទៃពោះ និង​កុមារ​អាយុក្រោម ២ ឆ្នាំការឧបត្ថម្ភសាច់ប្រាក់ជូនគ្រួសារក្រីក្រ ​ការដាក់ចេញនូវផែនការយុទ្ធសាស្ត្រ​កម្លាំង​សេវាសង្គម ២០២២-២០៣១ និងការដាក់ចេញនូវគោលការណ៍​ក្នុងការជួយ​ជន​អនាថា ជនវិបល្លាសស្មារតី ​និងជនចំណាកស្រុក។

ពាក់ព័ន្ធនឹងកិច្ចការវិស័យសង្គមកិច្ចនេះ លោកស្រី Gloria Donateជានាយកប្រចាំប្រទេសនៃអង្គការ Save the Children បានមើលឃើញថា រយៈពេលពីរឆ្នាំមកនេះក្រសួងសង្គមកិច្ច បានបំពេញ​កិច្ចការជាច្រើន ​ដោយមិនទុកប្រជាពលរដ្ឋចោលនោះទេ។ ក្នុងនាមជាអង្គការដៃគូលោកស្រីថា Save the Children ក៏មានការប្ដេជ្ញាក្នុងការពង្រឹង​ កម្លាំងសេវាសង្គមនៅកម្ពុជា តាមរយៈការគាំទ្រ​រាជរដ្ឋាភិបាល និងអង្គការសង្គមស៊ីវិល៕អត្ថបទ៖ គឹមហុក