​ស្នូកឃ័រ៖ ​ទីបំផុត​កីឡាករ​អង់គ្លេស Ronnie O’Sullivan ដណ្តើមបាន​ជើងឯក​ពិភពលោក​លើក​ទី៧ របស់ខ្លួន​ក្រោយ​ជ័យជំនះ ១៨-១៣ហ្វ្រេ​ម​លើ​មិត្ត​រួម​ជាតិ​អង់គ្លេស Judd Trump នៅ​វគ្គ​ផ្តាច់ព្រ័ត្រ​។ ​​កីឡាករ​វ័យ ៤៦ឆ្នាំ​រូបនេះ​ក៏បាន​ក្លាយជា​កីឡាករ​វ័យ​ចំណាស់​បំផុត​ផងដែរ​ដែល​គ្រង​ជើងឯក​ពិភពលោក បំបែក​កំណត់ត្រា​ចាស់​របស់លោក Ray Reardon ដែល​ឈ្នះ​ជើងឯក​ពិភពលោក​សរុប ៦លើក​ក្នុង​វ័យ ៤៥ឆ្នាំ​នៅ​ឆ្នាំ១៩៧៨​។

​​ការប្រកួត​ដំណាក់កាល​ចុងក្រោយ​ថ្ងៃ​ចន្ទ​ម្សិលមិញ Judd Trump ចាប់ផ្តើម​ដោយ​តាម​ពីក្រោយ O’Sullivan ១២-៥ហ្វ្រេ​ម តែ​ក៏បាន​យកឈ្នះ ៦ហ្វ្រេ​ម​វិញ​ដែរ​ដើម្បី​កាត់បន្ថយ​ការនាំ​មុខមក​ត្រឹម ១៤-១១ហ្វ្រេ​ម​។ ​​តែ​ក្រោយ Ronnie O’Sullivan ក៏បាន​យកឈ្នះ ៤ហ្វ្រេ​ម​ក្នុងចំណោម ៦ហ្វ្រេ​ម​នៅពេល​រសៀល​ដើម្បី​គ្រង​ជើងឯក​ទទួលបាន​ប្រាក់រង្វាន់ ៥០ម៉ឺន​ផោន​។ ​​រំលឹកថា Ronnie O’Sullivan ធ្លាប់​ឡើង​វគ្គ​ផ្តាច់ព្រ័ត្រ​ជើងឯក​ពិភពលោក​សរុប ៨លើក​ឈ្នះ ៧លើក ចាញ់​មួយ​លើក​ប៉ុណ្ណោះ​គឺ​ចាស់ Mark Selby នៅ​ឆ្នាំ២០១៤​។

​​មុន​ឡើង​មកដល់​វគ្គ​ផ្តាច់ព្រ័ត្រ​នេះ O’Sullivan បាន​យកឈ្នះ David Gilbert ជុំ​ទី១ យកឈ្នះ Mark Allen ជុំ​ទី២ យកឈ្នះ Stephen Maguire វគ្គ ៨នាក់​ចុងក្រោយ និងយកឈ្នះ John Higgins នៅ​វគ្គ​ពាក់កណ្តាល​ផ្តាច់ព្រ័ត្រ​។ ​​Ronnie O’Sullivan នៅពេលនេះ​មិនទាន់​គិតគូ​រឿង​ចូលនិវត្តន៍​នៅឡើយ និង​សំឡឹង​ឃើញ​ការ​បំបែក​កំណត់ត្រា​ពិភពលោក ​កីឡាករ​ដែល​ឈ្នះ​ជើងឯក​ពិភពលោក​បាន​ច្រើន​បំផុត​សរុប ៨លើក​។ ​នេះ​ជា​លើក​ទី៧ របស់គេ និង​កំពុង​ស្មើគ្នា​ក្នុង​កំណត់ត្រា​ជាមួយ Stephen Hendry៕

​អត្ថបទ​៖​នាង សុភា​វុ​ធ