​​អ៊ុយ​ក្រែ​ន៖ អាជ្ញាធរ​អ៊ុយ​ក្រែ​ន​បាន​និយាយថា ការវាយប្រហារ​ដោយ​មី​ស៊ី​ល​របស់​រុស្ស៊ី​បាន​វាយប្រហារ​ទៅលើកំពង់​ផែ​សមុទ្រ​ខ្មៅ​របស់​ទីក្រុង Odesa កាលពី​ល្ងាច​ថ្ងៃ​ចន្ទ​បណ្ដាល​ឲ្យ​ក្មេង​ជំទង់​ម្នាក់​ស្លាប់ និង​ម្នាក់ផ្សេងទៀត​រង​របួស​។

​លោក Nataly Gumenyuk ប្រធាន​មជ្ឈមណ្ឌល​ព័ត៌មាន​សម្របសម្រួល​រួម​ របស់​កងកម្លាំងការពារ​ភាគខាងត្បូងប្រទេស​អ៊ុយ​ក្រែ​ន​បាន​និយាយថា ក្មេងប្រុស​អាយុ ១៥​​ឆ្នាំ​ម្នាក់​ត្រូវបាន​សម្លាប់បន្ទាប់ពី​មី​ស៊ី​ល​បាន​វាយប្រហារ​អគារ​លំនៅឋាន​មួយកន្លែង​ដែលមាន​មនុស្ស ៥នាក់​កំពុង​ជ្រកកោន​។ លោក Gumenyuk និយាយថា​ ស្ថាប័ន​សាសនា​មួយកន្លែង​ត្រូវបាន​បំផ្លាញ​ដោយ​ការបាញ់ផ្លោង​ជា​បន្តបន្ទាប់​។​ ​លេខា​ក្រុមប្រឹក្សាសន្តិសុខ​ជាតិ​អ៊ុយ​ក្រែ​នលោក Oleksiy Danilov និយាយថា​ ការវាយប្រហារលើ​ទីក្រុង Odesa បាន​បំផ្លាញ​ដំបូល​ព្រះវិហារ​មួយកន្លែង ហើយ​រុស្ស៊ី​កាលពី​ថ្ងៃ​ចន្ទ​បាន​បំផ្លាញ​ស្ពានឆ្លងកាត់​មួយ​នៅ​ភាគ​ខាងលិច​ទីក្រុង Odesa ជា​កន្លែង​ដែល​ទន្លេ Dniester ហូរ​ចូលទៅក្នុង​សមុទ្រខ្មៅ​។

ស្ពាន​នេះ​បាន​រង​ការបំផ្លាញ​រួចទៅហើយ ​ក្នុងការ​វាយប្រហារ​ដោយ​មី​ស៊ី​ល​របស់​រុស្សី​ពីរលើក​កាលពី​ពេលមុន​។ វា​បាន​ផ្តល់នូវ​ការតភ្ជាប់​ផ្លូវ​រថភ្លើង​តែមួយគត់ និង​ផ្លូវ​ហាយ​វេសម្រាប់​ភ្ជាប់​ទៅកាន់តំបន់​ភាគ​ខាងលិច​ទីក្រុង Odesa។​ ​ការបំផ្លាញ​ស្ពាន​បាន​កាត់បន្ថយ​ដំណើរ​ការចូល​នៃ​ការដឹកជញ្ជូន​អាវុធ និង​ទំនិញ​ផ្សេងទៀត​ពីប្រទេស​រ៉ូ​ម៉ា​នី​ដែល​នៅ​ជិតខាង៕

អត្ថបទ៖ ប៊ុនថន