ភ្នំពេញ៖ សហគ្រាស កែច្នៃ វេចខ្ចប់ចំណីអាហារ បានដំណើរខ្សែច្រវ៉ាក់ផលិតកម្មល្អប្រសើរឡើងវិញ ជាបណ្តើរៗហើយ នៅក្នុងការវេចខ្ចប់ចំណីអាហារ សម្រាប់ការផ្គត់ផ្គង់តម្រូវការទីផ្សារ និងភ្ញៀវទេសចរណ៍ ខណៈកម្ពុជាបើកប្រទេសឡើងវិញ ដោយគ្មានការរឹតត្បិត។

លោក មៀវ សុខទ្រី ប្រធានសមាគមអ្នកផលិតចំណីអាហារកម្ពុជា ថ្លែងប្រាប់ភ្នាក់ងារអ្នកយក​ព័ត៌មាន BTV បានឲ្យដឹងថា ទាក់ទងសិប្បកម្ម ឬសហគ្រាសកែច្នៃ វេចខ្ចប់ចំណីអាហារ បច្ចុប្បន្ន​បានដំណើរការខ្សែច្រវ៉ាក់ផលិតកម្ម ងើបឡើងវិញជាបណ្តើរៗហើយ ក្នុងនោះកត្តាងើបឡើងនេះ ដោយសារនៅពេលស្ថានភាពជម្ងឺកូវីដ១៩ ដែលបាន​កំពុងផ្ទុះឡើង​ខ្លាំងក្លា និងមានការរឹតត្បិត​នៅ​តាមព្រំដែន ប្រជាពលរដ្ឋបានងាកមកប្រើប្រាស់​ផលិតផលខ្មែរ ជាច្រើន។

លោក សុង ខេងលាង នាយកគ្រប់គ្រងសហគ្រាស ស៊ី អេស អិល ដែលជាសហគ្រាសវិចខ្ចប់​ចំណី​អាហារ ថ្លែងថា នៅពេលការផ្ទុះឡើងនៃវិបត្តិជម្ងឺកូវីដ ១៩ ស្ថានភាពអាជីវកម្មត្រូវបានធ្លាក់ចុះ តែ​ដោយសារការយកចិត្តទុកដារពីរាជរដ្ឋាភិបាល ជួយគាំទ្រតាមរយៈការផ្តល់ការកម្ចីឥណទាន និង​ការរៀបចំសម្រួលដល់ការធ្វើដំណើរនៅពេលបិទខ្ទប់ជាដើម បានធ្វើឲ្យសហគ្រាសរបស់​លោកអាច​ដំណើរ​ការបាន។

មកដល់បច្ចុប្បន ​បន្ទាប់រាជរដ្ឋាភិបាល ​បើកប្រទេសគ្មានការរឹតត្បិត សន្ទុះខ្សែច្រវ៉ាក់ផលិតកម្ម​បាន​ងើបឡើងវិញ ​និងមានការបញ្ជាទិញជាហូរហែរ ​ហើយស្ថិតក្នុងពេលវេលាដ៏ល្អប្រសើរនេះ លោក​គ្រោង​រៀបចំផែនការថ្មីមួយ ​សម្រាប់​ការ​វេច​ខ្ចប់​ចំណីអាហារបម្រើ​វិស័យ ​ទេសចរណ៍ ខណៈកម្ពុជា​កំពុងទទួលបានភ្ញៀវទេសចរណ៍ជាបណ្តើរៗ។

សូមបញ្ជាក់ថា៖ ទាក់ទងវិស័យសេវាកម្ម នៅក្នុងឆ្នាំ ២០២២នេះ អនុវិស័យលក់ដុំ-រាយ ត្រូវបាន​ព្យាករណ៍​ថា នឹងបន្តកើនឡើង​ ប៉ុន្តែក្នុងអត្រាទាប​ជាងកំណើន​មុនពេលមានវិបត្តិ ដោយ​សារ​ឥទ្ធិពល​ថមថយ​ចំណូលរបស់ ​ប្រជាជន​ស្របពេល​ដែលអនុវិស័យសំខាន់ៗ ដែលជាប្រភព​ចំណូល​របស់ប្រជាជនត្រូវបានរំពឹងថា​នឹងងើបឡើងសន្សឹមៗ៕ អត្ថបទ៖ សុន រ៉ាឌី