ប្រទេស​អ៊ីរ៉ង់បានផ្ញើលិខិតទៅកាន់អង្គការសហប្រជាជាតិ (UN) ដោយចោទប្រកាន់សហរដ្ឋអាមេរិកថា បាន​រំលោភលើអនុស្សរណៈនៃការយោគយល់គ្នាអ៊ីស្លាម៉ាបាដ (Islamabad MOU) ជាកិច្ចព្រម​ព្រៀង​ដែលមានគោលបំណងបញ្ចប់សង្គ្រាម និងចោទ​ថា បាន​ប្រព្រឹត្ត​ឧក្រិដ្ឋកម្ម​សង្គ្រាម។

យោងតាមទីភ្នាក់ងារសារព័ត៌មានរដ្ឋអ៊ីរ៉ង់ IRNA បានឱ្យដឹងថា នៅក្នុងលិខិតផ្ញើជូនអគ្គលេខាធិការ UN លោក Antonio Guterres និងប្រធានក្រុមប្រឹក្សាសន្តិសុខ UN តំណាងអចិន្ត្រៃយ៍របស់អ៊ីរ៉ង់ប្រចាំ UN លោក Amir Saeid Iravani បានសរសេរថា៖ «ស្ទើរតែភ្លាមៗបន្ទាប់ពីមាន​ការចុះហត្ថលេខាលើ MOU និងបន្តរហូតមកដល់ពេល​នេះ សហរដ្ឋអាមេរិកមិនត្រឹមតែមិន​គោរពតាមការប្តេជ្ញាចិត្តរបស់ខ្លួនប៉ុណ្ណោះទេ ប៉ុន្តែថែមទាំងបានបំផ្លាញគ្រឹះដ៏សំខាន់នៃអនុស្សរណៈនេះយ៉ាងសកម្ម និងជាប្រព័ន្ធទៀតផង»។

លិខិតនោះបានចោទប្រកាន់ពីការរំលោភបំពាននានា ដែល​រួមមានការបើកការវាយប្រហារយោធាជាថ្មីរបស់សហរដ្ឋអាមេរិក លើទឹកដីអ៊ីរ៉ង់ ការលុបចោលអាជ្ញាប័ណ្ណ សម្រាប់ការលក់ប្រេងរបស់អ៊ីរ៉ង់ ការបង្កើតផ្លូវនាវាចរណ៍ស្របគ្នាតាមច្រកសមុទ្រ Hormuz និងការបន្តការ​គាំទ្ររបស់សហរដ្ឋអាមេរិក ចំពោះប្រតិបត្តិការយោធារបស់អ៊ីស្រាអែល នៅក្នុងប្រទេសលីបង់។

ជាមួយ​គ្នានេះ លោក Iravani បានបន្ថែម​ថា សង្គ្រាមលើប្រទេសអ៊ីរ៉ង់ ដែលបានចាប់ផ្តើមឡើងកាលពីថ្ងៃទី២៨ ខែកុម្ភៈ គឺជា «សកម្មភាពឈ្លានពានដោយគ្មានការបង្កហេតុ» ពីសំណាក់សហរដ្ឋអាមេរិក និងអ៊ីស្រាអែល ដែលរំលោភលើធម្មនុញ្ញ UN ហើយលោកបានសង្កត់ធ្ងន់​ថា សកម្មភាពទាំងនោះ «បានរួមបញ្ចូលនូវឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិជាច្រើន»៕