កងឆ្មាំបដិវត្តន៍អ៊ិស្លាមអ៊ីរ៉ង់ (IRGC) កាលពីថ្ងៃអង្គារ (ទី១៤ ខែកក្កដា ឆ្នាំ២០២៦) បានអះអាងថា ខ្លួនបានបំផ្លាញអាវុធ និងយានដ្រូន​របស់សហរដ្ឋអាមេរិកជាច្រើន អំឡុង​ការវាយប្រហារ នៅប្រទេស​បារ៉ែន និងកូ​វ៉ែត ខណៈ​ជម្លោះ​ រវាងទីក្រុងតេអេរ៉ង់ និងវ៉ាស៊ីនតោន កើន​ឡើង​ថ្មី​។

ក្នុងសេចក្តីថ្លែងការណ៍មួយដែលចេញផ្សាយដោយទីភ្នាក់ងារសារព័ត៌មានរដ្ឋ IRNA IRGC បានឱ្យដឹង​ថា៖ «ឃ្លាំងស្តុកអាវុធ និងគ្រឿងបន្លាស់ជាច្រើន សម្រាប់នាវា និងយានដ្រូន​របស់​សត្រូវ ត្រូវបានបំផ្លាញនៅមូលដ្ឋាន Sheikh Isa ក្នុងប្រទេសបារ៉ែន ក្នុងអំឡុងពេលមាន​ប្រតិបត្តិការក្នុងពេលដំណាលគ្នា ដោយ​មីស៊ីល និងយានដ្រូន​ កាលពីប៉ុន្មានម៉ោងមុន»។

IRGC បានបន្ថែមថា កងកម្លាំងរបស់ខ្លួន ក៏បាន «បំផ្លាញ ឬបង្កការ​ខូចខាត​យានដ្រូន​មួយចំនួន ដោយការវាយប្រហារលើកន្លែង​ចតយន្តហោះ​ ដែលយាន​ដ្រូន​ប្រភេទ MQ9 របស់សត្រូវ ត្រូវបានដាក់ពង្រាយ នៅមូលដ្ឋាន Ali Salem ក្នុងប្រទេសកូ​វ៉ែត»។

កូ​វ៉ែត នៅ​មុននេះបានឱ្យដឹង​ថា ប្រព័ន្ធ​ការពារដែនអាកាសរបស់ខ្លួន បានវាយប្រហារ «គោលដៅផ្លូវអាកាសរបស់សត្រូវ» នៅក្នុងដែនអាកាសរបស់ប្រទេស ខណៈពេលដែលស៊ីរ៉ែនបានបន្លឺឡើងជាលើកទី៤ នៅបារ៉ែន កាល​ពី​ល្ងាចថ្ងៃអង្គារ។

គួរបញ្ជាក់​ថា ការវាយប្រហារទាំងនេះកើតឡើងចំពេលមានភាពតានតឹងកាន់តែខ្លាំងឡើងៗ រវាងសហរដ្ឋអាមេរិក និងអ៊ីរ៉ង់ ពាក់​ព័ន្ធ​នឹង​ច្រកសមុទ្រ Hormuz ដោយភាគីទាំង២ បានការវាយប្រហារតប​ត​គ្នា ក្នុងរយៈពេលប៉ុន្មានថ្ងៃថ្មីៗនេះ៕