ភ្នំពេញ៖ អ្នកប្រើប្រាស់ និងអាជីវកម្មនៅកម្ពុជានឹងត្រូវបានការពារកាន់តែប្រសើរឡើងពីផលិតផលមិនមានសុវត្ថិភាព ខណៈដែលចក្រ ភពអង់គ្លេស និងកម្ពុជាពង្រឹងកិច្ចសហប្រតិបត្តិការដាក់ជាក់ស្តែងលើសុវត្ថិភាពផលិតផល និងការការពារអ្នកប្រើប្រាស់។

លោក Graham Russell នាយកប្រតិបត្តិនៃការិយាល័យសុវត្ថិភាព និងស្តង់ដារផលិតផល (OPSS) របស់ចក្រភព អង់គ្លេស បានមកទស្សនកិច្ចនៅទីក្រុងភ្នំពេញនៅថ្ងៃទី ១៣-១៤ ខែកក្កដា ដើម្បីធ្វើការជាមួយអ្នកត្រួតពិនិត្យ អាជីវកម្ម និង ក្រុមអ្នកប្រើប្រាស់កម្ពុជា។ ដំណើរទស្សនកិច្ចនេះ រួមមានការសង្កេតមើលការត្រួតពិនិត្យឃ្លាំមើលទីផ្សារ និងការធ្វើតេស្តមន្ទីរ ពិសោធន៍ដែលធ្វើឡើងដោយអគ្គនាយកដ្ឋានការពារអ្នកប្រើប្រាស់ និងការប្រកួតប្រជែង (DGCC) របស់ប្រទេសកម្ពុជា។

លោក Graham Russell បានមានប្រសាសន៍ថា៖ «ចក្រភពអង់គ្លេសបានចំណាយពេលរាប់ទសវត្សរ៍ក្នុងការអភិវឌ្ឍប្រព័ន្ធសុវត្ថិភាពផលិតផលដែលដំណើរការ សម្រាប់អ្នកប្រើប្រាស់ និងអាជីវកម្មរួមគ្នា - ហើយមេរៀនទាំងនោះមានជាប់ទាក់ទងដោយផ្ទាល់ទៅនឹងប្រទេស កម្ពុជា ខណៈដែលវាធ្វើសមាហរណកម្មកាន់តែស៊ីជម្រៅទៅក្នុងទីផ្សារតំបន់ និងសកល។ បទប្បញ្ញត្តិដ៏រឹងមាំ និង គួរឱ្យទុកចិត្តទាក់ទាញការវិនិយោគ ការពារប្រជាជន និងគាំទ្រដល់កំណើនប្រកបដោយចីរភាព។ ខ្ញុំពិតជាមានការ ចាប់អារម្មណ៍យ៉ាងខ្លាំងចំពោះការប្តេជ្ញាចិត្តរបស់និយតកររបស់ប្រទេសកម្ពុជា ហើយខ្ញុំទន្ទឹងរង់ចាំភាពជាដៃគូនេះ បន្តផ្តល់លទ្ធផលជាក់ស្តែងសម្រាប់អ្នកប្រើប្រាស់ និងអាជីវកម្មនៅកម្ពុជា»។

សេចក្តីប្រកាសព័ត៌មាន របស់ ចក្រភពអង់គ្លេស បានផ្សាយនៅថ្ងៃទី ១៥ កក្កដានេះ បានបញ្ជាក់ថា សិក្ខាសាលាមួយដែលប្រមូលផ្តុំអង្គការរដ្ឋាភិបាល ឧស្សាហកម្ម និងអ្នកប្រើប្រាស់ បានផ្តល់ឱ្យអ្នកធ្វើគោលនយោបាយ និង អាជីវកម្មកម្ពុជានូវឱកាសដើម្បីរៀនដោយផ្ទាល់ពីបទពិសោធន៍របស់ចក្រភពអង់គ្លេសក្នុងការកសាងប្រព័ន្ធបទប្បញ្ញត្តិដែល ការពារអ្នកប្រើប្រាស់។ អ្នកចូលរួមបានរៀនពីរបៀបដែលការឃ្លាំមើលទីផ្សារ ប្រកបដោយប្រសិទ្ធភាព ដំណើរការអនុវត្តច្បាប់ច្បាស់លាស់ និងស្ថាប័នរឹងមាំអាចបង្កើតទំនុកចិត្តសម្រាប់អ្នកប្រើប្រាស់ និង វិនិយោគិន។

ចក្រភពអង់គ្លេសកំពុងគាំទ្រប្រទេសកម្ពុជាក្នុងការបង្កើតនិតិវិធីប្រតិបត្តិការស្ទង់ដារសម្រាប់ការឃ្លាំមើលទីផ្សារផលិតផល ដោយផ្តល់ឱ្យអ្នកត្រួតពិនិត្យនូវការណែនាំច្បាស់លាស់ និងស៊ីសង្វាក់គ្នានៅពេលត្រួតពិនិត្យទំនិញនៅក្នុងទីផ្សារ និងហាង នានាទូទាំងប្រទេស។ ការងារនេះនឹងត្រូវបានសាកល្បង និងដាក់ឱ្យដំណើរការទៅកាន់ខេត្តនានា រួមទាំងរាជធានីភ្នំពេញ និងតំបន់ព្រំដែនសំខាន់ៗនៅពេលក្រោយក្នុងឆ្នាំ ២០២៦។

ដំណើរទស្សនកិច្ចនេះក៏បានពង្រឹងកិច្ចសហប្រតិបត្តិការតាមរយៈវេទិកាពាណិជ្ជកម្ម និងវិនិយោគរួមគ្នាកម្ពុជា-ចក្រភព អង់គ្លេស (JTIF) ដែលជាវេទិកាសំខាន់សម្រាប់កិច្ចសន្ទនាសេដ្ឋកិច្ចទ្វេភាគីរវាងរដ្ឋាភិបាលទាំងពីរ ដែលប្រមូលផ្តុំអ្នកធ្វើ គោលនយោបាយ និយតករ និងអាជីវកម្មរបស់ចក្រភពអង់គ្លេស និងកម្ពុជា ដើម្បីជំរុញកំណែទម្រង់ពាណិជ្ជកម្ម ការវិនិយោគ និងសេដ្ឋកិច្ច។ ខណៈពេលដែលប្រទេសកម្ពុជាកំពុងរៀបចំខ្លួនសម្រាប់ការចាកចេញពីប្រទេសអភិវឌ្ឍន៍តិចតួចបំផុតនៅឆ្នាំ ២០២៩ និង បន្តធ្វើសមាហរណកម្មកាន់តែស៊ីជម្រៅទៅក្នុងពាណិជ្ជកម្មក្នុងតំបន់ និងសកល ក្របខ័ណ្ឌសុវត្ថិភាពផលិតផលដ៏រឹងមាំ គឺមានសារៈសំខាន់កាន់តែខ្លាំងឡើង ទាំងដើម្បីការពារអ្នកប្រើប្រាស់ និងគាំទ្រដល់អាជីវកម្មដែលប្រកួតប្រជែងនៅក្នុងទីផ្សារអន្តរជាតិ៕