អេស្ប៉ាញ៖ ស្ថានីយប្រេងឥន្ធនៈជិត ៤,០០០កន្លែងនៅក្នុងប្រទេសអេស្ប៉ាញកំពុងរង្គោះរង្គើឈានដល់ការបិទទ្វារ ដោយសារតែផលប៉ះពាល់នាំមកដោយជំងឺរាតត្បាតដែលកំពុងបន្ត និងជម្លោះរុស្ស៊ី-អ៊ុយក្រែន ទោះបីជារដ្ឋាភិបាលអេស្ប៉ាញបានអនុវត្តគោលនយោបាយថ្មី ដើម្បីទូទាត់ការកើនឡើងតម្លៃថាមពលក៏ដោយ។
នាយករដ្ឋមន្ត្រីអេស្ប៉ាញលោក Pedro Sanchez បានប្រកាសកាលពីចុងខែមីនានូវការបញ្ចុះតម្លៃប្រេងឥន្ធនៈ ២០សេនក្នុងមួយលីត្រសម្រាប់អ្នកបើកបរទាំងអស់នៅក្នុងប្រទេសអេស្ប៉ាញ។ ការឧបត្ថម្ភធនតម្លៃនឹងត្រូវបែងចែករវាងរដ្ឋាភិបាលដែលនឹងត្រូវបង់ប្រាក់ ១៥សេន ហើយម្ចាស់ស្ថានីយប្រេងឥន្ធនៈចំណាយ ៥សេន។ រហូតមកដល់ពេលនេះស្ថានីយប្រេងឥន្ធនៈជាង ៣៥០កន្លែងបានបិទទ្វារជាបណ្ដោះអាសន្នដើម្បីជៀសវាងការខាតបង់ ហើយស្ថានីយជិត ៣,០០០ ទៅ ៤,០០០កន្លែងផ្សេងទៀតព្រួយបារម្ភថា នឹងប្រឈមមុខការបិទទ្វារដូចគ្នា។ លោក Nacho Rabadan Rodriguez នាយកប្រតិបត្តិសហព័ន្ធសហគ្រាសស្ថានីយសេវាប្រទេសអេស្ប៉ាញបាននិយាយថា យោងតាមតួលេខរបស់យើង ស្ថានីយប្រេងប្រមាណ ៣៥០កន្លែងបានបិទទ្វាររួចហើយ។ មូលហេតុគឺដោយសារតែពួកគេជួបឧបសគ្គផ្នែកហិរញ្ញវត្ថុ និងខ្វះទុនបម្រុង។
ម្ចាស់ស្ថានីយប្រេងឥន្ធនៈនៅទីក្រុង La Guardia ប្រទេសអេស្ប៉ាញបាននិយាយថា រដ្ឋាភិបាលបានសម្រេចឱ្យពួកយើងក្លាយជាដៃគូរបស់ពួកគេ ដោយរដ្ឋាភិបាលបានសន្យាថានឹងបង់ប្រាក់ជាមុនដល់យើង ដែលស្ថានីយខ្លះបានទទួលប្រាក់ ខ្លះទៀតមិនបានទទួល។ យើងចំណេញបានតែ ១០សេនក្នុងមួយលីត្រ ហើយយើងត្រូវផ្តល់ឱ្យរដ្ឋាភិបាល ២០សេន។ លទ្ធផលនេះកំពុងបង្កើតបញ្ហាសាច់ប្រាក់ធ្ងន់ធ្ងរ ដែលធ្វើឱ្យយើងមិនអាចធ្វើទៅរួចក្នុងការរក្សាស្ថានីយប្រេងឲ្យនៅបើកដំណើរការ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
