ប្រធានាធិបតីអាមេរិក លោក Donald Trump បាននិយាយថា លោកនៅតែជឿជាក់ថា មេដឹកនាំ​រុស្ស៊ី លោក Vladimir Putin បានត្រៀមខ្លួនរួចជាស្រេច ដើម្បីធ្វើកិច្ចព្រមព្រៀងបញ្ចប់សង្គ្រាមនៅអ៊ុយក្រែន ក្នុងពេលឆាប់ៗនេះ ទោះបីជាមានការវាយប្រហារជាបន្តបន្ទាប់ និងការចង្អុលបង្ហាញមួយចំនួន ដែល​ថា រុស្ស៊ីទំនងជានឹងធ្វើឱ្យជម្លោះកាន់តែធ្ងន់ធ្ងរឡើងក៏ដោយ។

នៅក្នុងបទសម្ភាសន៍ជាមួយ​ប្រព័ន្ធផ្សព្វផ្សាយ Fox News នៅពេលត្រូវ​បាន​សួរអំពីការសន្ទនារបស់លោកជាមួយលោក Putin លោក Trump បាននិយាយថា៖ «ខ្ញុំគិតថា លោកត្រៀមខ្លួនរួចជាស្រេចហើយ​ ដើម្បីធ្វើកិច្ចព្រមព្រៀង»។

បទសម្ភាសន៍នេះត្រូវបានថតកាលពី​ថ្ងៃអង្គារ (ទី១៤ ខែកក្កដា ឆ្នាំ២០២៦) ហើយ​ចាក់ផ្សាយនៅថ្ងៃពុធ។

ប្រភពចំនួន ៣ ដែលស្និទ្ធនឹងវិមានក្រឹមឡាំង បានប្រាប់សារព័ត៌មាន​ Reuters ថា លោក Putin កំពុងបដិសេធការអំពាវនាវឱ្យមាន​ការ​ចរចាសន្តិភាពជាមួយទីក្រុងគីវ ហើយទំនងជានឹងធ្វើឱ្យជម្លោះកាន់តែ​ធ្ងន់ធ្ងរឡើង ដែលឥឡូវនេះស្ថិតនៅក្នុងឆ្នាំទី៥ ហើយ​។

លោក Trump បានសន្យាថា នឹងប្រឹងប្រែង​ឱ្យមានកិច្ចព្រមព្រៀង ចំពោះសង្គ្រាមនេះ នៅថ្ងៃដំបូងនៃអាណត្តិប្រធានាធិបតីរបស់លោក កាល​ពី​ខែមករា ឆ្នាំ២០២៥ តែមក​ទល់​ពេលនេះ នៅតែ​រក​ច្រកចេញ​មិន​ឃើញ​ឡើយ សម្រាប់ការប្រយុទ្ធ​គ្នានេះ​៕