អេឡិចត្រូនិក៖ ការប្រកួតកីឡាអេឡិចត្រូនិកបែបកម្សាន្ដ All Star Showdown 2022 ត្រូវបានសម្រិតសម្រាំងអ្នកនិយមលេងកីឡាអេឡិចត្រូនិក រួមទាំងអ្នកសិល្បៈល្បីៗជាច្រើនមកពី ៦ប្រទេសដើម្បីចូលរួមការប្រកួតលើវិញ្ញាសា Mobile Legends Bang Bang រួមមានកម្ពុជា ឥណ្ឌូនេស៊ី សិង្ហបុរី ហ្វីលីពីន ម៉ាឡេស៊ី និងមីយ៉ាន់ម៉ា។
កម្មវិធីនេះបែងចែកការប្រកួតជា ២ដំណាក់កាល ទី១-អ្នកគាំទ្រ និងអ្នកស្រលាញ់ពេញចិត្តកីឡាអេឡិចត្រូនិកនឹងបានឃើញ All Star ប្រមាណ ២១០នាក់មកពីបណ្ដាប្រទេសខុសៗគ្នាដែលត្រូវបែងចែកជាក្រុម សម្រាប់អ្នកគាំទ្រត្រូវធ្វើការបោះឆ្នោតគាំទ្រក្រុមសំណព្វចិត្ដរបស់ខ្លួន។ ការបោះឆ្នោតនេះបានធ្វើឡើងពីថ្ងៃទី២៩ ខែមេសាដល់ថ្ងៃទី០៤ ខែឧសភាស្អែកនេះ។ ក្រុមទទួលបានសំឡេងគាំទ្រច្រើនជាងគេ ៤ក្រុមនឹងត្រូវមានភារកិច្ចប្រកួតជាមួយគ្នាដើម្បីស្វែងរកក្រុមជ័យលាភីលេខ១ សម្រាប់ចូលរួមព្រឹត្តិការណ៍ All Star អន្ដរជាតិ។
ចំពោះលទ្ធផលនៃការប្រកួតក្នុងស្រុកក្នុងចំណោមក្រុមកំពូលទាំង ៤ នឹងត្រូវប្រកាសនាថ្ងៃទី១០ ខែឧសភាខាងមុខ ហើយក្រុមជ័យលាភីនឹងត្រូវចូលរួមប្រកួតក្រុមឈ្នះមកពី ៥ប្រទេសផ្សេងព្រមជាមួយបុគ្គលល្បីៗជាច្រើនផងដែរ។ សម្រាប់ការប្រកួតដំណាក់កាលទី២ ឬការប្រកួត All Star អន្ដរជាតិគ្រោងនឹងចាប់ផ្ដើមនាថ្ងៃទី១៥ ខែឧសភាខាងមុខ។ ចំពោះក្រុម All Stars នឹងត្រូវដឹកនាំ និងរៀបចំក្រុមដោយតារាចម្រៀងលោក ថេណា ខណៈអ្នកគាំទ្រដែលចូលរួមកម្មវិធីនេះក៏នឹងមានឱកាសឈ្នះរង្វាន់វត្ថុអនុស្សាវរីយ៍ជាច្រើនផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
