រដ្ឋមន្រ្តីការពារជាតិអ៊ីស្រាអែលលោក Israel Katz និយាយប្រាប់សមភាគីសហរដ្ឋអាមេរិកលោក Pete Hegseth នៅព្រឹកថ្ងៃព្រហស្បតិ៍នេះថា អ៊ីស្រាអែលបានប្តេជ្ញាចិត្តរក្សាកងកម្លាំងរបស់ខ្លួននៅតំបន់សន្តិសុខដែលពួកគេបានបង្កើតឡើងនៅក្នុងប្រទេសលីបង់ ស៊ីរី និងតំបន់ហ្កាហ្សាស្រ្ទីប ។

ការិយាល័យរបស់លោក Katz និយាយនៅក្នុងសេចក្តីថ្លែងការណ៍ថា ប្រមុខការពារជាតិទាំង ២ បាននិយាយគ្នាកាលពីយប់កន្លងទៅ ហើយលោក Katz បានធ្វើការសង្កត់ធ្ងន់ពីការប្តេជ្ញាចិត្តរបស់អ៊ីស្រាអែល ក្នុងការបន្តឈរជើងនៅតំបន់សន្តិសុខក្នុងប្រទេសស៊ីរី តំបន់ហ្កាហ្សា និងប្រទេសលីបង់ ដើម្បីការពារព្រំដែនអ៊ីស្រាអែល និងសហគមន៍នៅជិតព្រំដែនពីការគំរាមកំហែងបង្កឡើងដោយក្រុមជីវពលប្រដាប់អាវុធ ។

លោក Katz បន្តថា ពួកយើងពុំធ្លាប់ដែលសុំសហរដ្ឋអាមេរិកឲ្យធ្វើការនៅកន្លែងរបស់ពួកយើងតាមបណ្តោយព្រំដែនរបស់ពួកយើងនោះឡើយ ។

សេចក្តីអត្ថាធិប្បាយរបស់លោក Katz បានកើតមានឡើង រយៈពេលប៉ុន្មានថ្ងៃប៉ុណ្ណោះ ក្រោយប្រធានាធិបតីសហរដ្ឋអាមេរិកលោក Donald Trump ស្នើសុំឲ្យនាយករដ្ឋមន្រ្តីអ៊ីស្រាអែលលោក Benjamin Netanyahu ដកទ័ពអ៊ីស្រាអែលចេញពីប្រទេសស៊ីរី និងប្រទេសលីបង់ ។

សារព័ត៌មាន Axios រាយការណ៍ដោយលើកពីប្រភពរបស់មន្រ្តីសហរដ្ឋអាមេរិកថា លោក Trumpនិយាយប្រាប់លោក Netanyahu ថា ការដាក់ពង្រាយទាហានអ៊ីស្រាអែល មានតែបង្កភាពតានតឹងនៅប្រទេសស៊ីរីប៉ុណ្ណោះ ។

សារព័ត៌មាន Axios រាយការណ៍បន្តថា លោក Trumpនិយាយប្រាប់លោក Netanyahu ថា ពួកគេមិនចង់បានអ្នកនៅទីនោះឡើយ ។ អ្នកគួរតែដាក់ពង្រាយទ័ពឡើងវិញ ៕