ទីភ្នាក់ងារសារព័ត៌មានពាក់កណ្តាលផ្លូវការ ISNA នៅថ្ងៃសុក្រ (ទី១៧ ខែកក្កដា​ ឆ្នាំ២០២៦) នេះ បាន​រាយការណ៍ថា ក្រសួងថាមពលអ៊ីរ៉ង់បានជំរុញឱ្យប្រជាពលរដ្ឋកាត់បន្ថយការប្រើប្រាស់អគ្គិសនី ដើម្បីជួយឱ្យមានស្ថិរ​ភាពនៃការផ្គត់ផ្គង់ថាមពល នៅក្នុងខេត្តភាគខាងត្បូងរបស់ប្រទេស បន្ទាប់ពីមាន​ការវាយប្រហាររបស់សហរដ្ឋអាមេរិក លើរោងចក្រថាមពល ដោយលើកឡើងពីការខូចខាត ដោយសារកម្ដៅ​ខ្លាំង និងហេដ្ឋារចនាសម្ព័ន្ធ។

សារព័ត៌មាន​ ISNA បាន​ឱ្យដឹង​ថា ក្រសួងបានស្នើសុំឱ្យអតិថិជនបិទម៉ាស៊ីនត្រជាក់រយៈពេល ១ម៉ោង ក្នុងអំឡុងពេលមាន​ការ​ប្រើប្រាស់ច្រើនបំផុត ដើម្បីជួយធានាបាននូវការផ្គត់ផ្គង់អគ្គិសនីដែលមានស្ថិរភាពជាងមុនដល់ខេត្តដែលរង​ប៉ះពាល់។

បញ្ជាការដ្ឋាន​កណ្តាលសហរដ្ឋអាមេរិក បានប្រាប់​កាលពីថ្ងៃព្រហស្បតិ៍ថា ខ្លួនបានបញ្ចប់ការវាយប្រហារវាយលុកថ្មី លើ​អ៊ីរ៉ង់ ដែលជាយប់ទី៦ ជាប់ៗគ្នានៃប្រតិបត្តិការយោធារបស់សហរដ្ឋអាមេរិកដែលកំណត់គោលដៅលើធន​ធាន​យោធាអ៊ីរ៉ង់។

ភាពតានតឹងក្នុងតំបន់ បានកើនឡើងចាប់តាំងពីខែកុម្ភៈ នៅពេលដែលសហរដ្ឋអាមេរិក និងអ៊ីស្រាអែលបានចាប់ផ្តើមការវាយលុករួមគ្នាប្រឆាំងនឹងអ៊ីរ៉ង់។ ទីក្រុងតេអេរ៉ង់បានឆ្លើយតបដោយការវាយប្រហារដោយមីស៊ីល និងយានដ្រូន ដោយ​កំណត់គោលដៅលើប្រទេសឈូងសមុទ្រដែលមានធនធាន​យោធាអាមេរិក។

អ៊ីរ៉ង់ និងសហរដ្ឋអាមេរិកបានចុះហត្ថលេខាលើអនុស្សរណៈនៃការយោគយល់គ្នា (UN) ដែលសម្របសម្រួលដោយប៉ាគីស្ថានកាលពីខែមុន ដែលមានគោលបំណងបញ្ចប់ជម្លោះ និងឈានដល់កិច្ចព្រមព្រៀងសន្តិភាពយូរអង្វែង។ តែ​ភាពតានតឹងបានកើនឡើងក្នុងរយៈពេលប៉ុន្មានថ្ងៃថ្មីៗនេះ ជុំវិញ​បញ្ហាច្រកសមុទ្រ Hormuz ដោយភាគីទាំង២ បានវាយប្រហារគ្នាទៅវិញទៅមក៕