​ទោចក្រយាន៖ កីឡាករ​ខ្មែរ​-​អាមេរិក Johnny Phan បាន​បង្ហាញ​នូវ​មោទនភាព​ក្រៃលែង បន្ទាប់ពី​ត្រូវ​បាន​សហព័ន្ធ​ខ្មែរ​កីឡា​ទោចក្រយាន ប្រកាស​ខ្លួន​ជា​បេក្ខភាព​ក្រុម​ជម្រើស​ជាតិ​កម្ពុជា ដែល​ជា​ប្រទេស​កំណើត​របស់​ឪពុកម្ដាយ​ខ្លួន ដើម្បី​ត្រៀម​ចូលរួម​ប្រកួត​កីឡា​ស៊ី​ហ្គេម លើក​ទី​៣១ នៅ​ប្រទេស​វៀតណាមនា​ចុង​ឆ្នាំ​២០២១។​

Johnny Phan គឺជា​កីឡាករ​ទោចក្រយាន​កម្រិត​ខ្ពស់​ជំនាញ​កង់​គួក ឬ Road Bike ដែល​ចាប់កំណើត​លើ​ទឹកដី​អាមេរិក តែ​មាន​ឪពុកម្ដាយ​ជា​ជន​ជាតិ​ខ្មែរ ដែល​ជា​អ្នក​ខេត្ត​បាត់ដំបង។ Johnny មាន​បទពិសោធន៍​ជាង ១០​ឆ្នាំ​មក​ហើយ ខណៈ ៧​ឆ្នាំ​ចុងក្រោយ គេ​ជា​ប្រធាន​ក្រុម និង​ជា​គ្រប់​ក្រង​ក្រុម​មួយ​ឈ្មោះ Cutaway One South ដែល​ជា​ក្រុម​អាជីព​កម្រិត​ខ្ពស់នៅ​អាមេរិក​ទៀត​ផង។​ ឆ្លើយតប​លើ​បណ្ដាញ​សង្គម​ផ្លូវការ​របស់​ខ្លួន Johnny បាន​បង្ហាញ​អារម្មណ៍​រំភើប​រីករាយ​ ក្នុង​ការ​ប្រកាស​ខ្លួន​ជា​កីឡាករ​ជម្រើសជាតិ​កម្ពុជា ត្រៀម​ប្រកួត​កីឡា​ស៊ី​ហ្គេមឆ្នាំ​២០២១ នៅ​វៀតណាម និង​ការ​ត្រៀម​ឆ្ពោះ​ទៅ​ស៊ី​ហ្គេមឆ្នាំ​២០២៣ ដែល​កម្ពុជា​ធ្វើ​ម្ចាស់ផ្ទះ​ជា​ប្រវត្តិសាស្ត្រ​លើកដំបូង។ ដូច្នេះ​គេ​បាន​ប្ដេជ្ញា​ចិត្ត និង​ខិតខំ​ប្រឹងប្រែង​ឲ្យ​អស់ពី​សមត្ថភាព ដើម្បី​ឆ្លើយតប​ជាមួយ​ការ​ផ្ដល់​ឱកាស​នេះ។​

Johnny បាន​សង្កត់​ធ្ងន់​ថា ខ្លួន​ពិតជា​មាន​មោទនភាព​ណាស់ ដែល​បាន​តំណាង​ប្រទេស​កំណើត​របស់​ក្រុម​គ្រួសារ​រ​សប់​ខ្លួន ស្រប​ពេល​បច្ចុប្បន្ន​ខ្លួន​មាន​បេសកកម្ម​មួយ​ ក្នុង​ព្រឹត្តិការ​ណ៍​មួយនៅ​អា​ត្ល​ង់​តា។ យ៉ាងណាមិញ Johnny បាន​ថ្លែងអំណរគុណ​ចំពោះ​សមាជិក​ក្រុម និង​គ្រួសារ​របស់​ខ្លួនដែល​តែង​ជំរុញ និង​លើកទឹកចិត្តរហូត​ធ្វើ​ឲ្យ​ខ្លួន​ទទួល​បាន​ជោគជ័យ ​ក្នុង​អាជីព​កីឡា​ទោចក្រយាន​នេះ។​ ​ទន្ទឹម​ជាមួយគ្នា​លោក នូ ចំរើន អគ្គលេខាធិការ​សហព័ន្ធ​ខ្មែរ​កីឡា​ទោចក្រយាន បាន​បញ្ជាក់​ថា សហព័ន្ធ​បាន​ធ្វើ​ការ​ជាមួយ Johnny Phan ជា​យូរ​មក​ហើយ ហើយ​គេ​ក៏​រីករាយ​ក្នុង​កិច្ចសហការ ដើម្បី​ឈាន​មក​ប្រកួត​តំណាង​ប្រទេស​កម្ពុជា​ដែរ។ លោក​ថា Johnny ជា​កីឡាករ​មាន​បទពិសោធន៍ និង​ធ្លាប់​ទទួល​បាន​លទ្ធផល​ល្អជា​ច្រើន ​ក្នុង​ការប្រកួត​នៅ​អាមេរិក។ ដូច្នេះ​លោក​រំពឹង​ថា វត្តមាន​របស់​គេ​នៅ​ស៊ី​ហ្គេម ក៏​នឹង​ទទួល​បាន​លទ្ធផល​ល្អ​ដែរ។​

​​អគ្គលេខាធិការ​សហព័ន្ធ​ដដែល​បន្ដ​ថា តាម​ការ​គ្រោង​ទុក Johnny Phan អាច​នឹង​មក​កម្ពុជា អំឡុង​ខែ​មេសា ឬ​ខែ​ឧសភា បន្ទាប់ពី​ស្ថានភាព​ជំងឺ​កូ​វីដ​-១៩ ធូរស្រាល ដើម្បី​ដកស្រង់​បទពិសោធន៍​មួយ​រយៈ​ពេល មុន​ត្រឡប់​ទៅ​អាមេរិក​វិញរហូតដល់​មុន​ការប្រកួត​ស៊ី​ហ្គេម ២​ខែ ទើប​គេ​មក​ប្រមូលផ្ដុំ​ហ្វឹកហាត់​ ជាមួយ​ក្រុម​ជម្រើស​ជាតិ​កម្ពុជា​ត្រៀម​ការប្រកួត​តែម្ដង ដោយ Johnny គ្រោង​ប្រកួត​លើ​វិញ្ញាសា ២ រួមមាន​វិញ្ញាសា Criterium និង​វិញ្ញាសា Individual Mass start។​ ​គួរ​បញ្ជាក់​ថា ការប្រកួត​កីឡា​ស៊ី​ហ្គេមលើក​ទី​៣១ នៅ​វៀតណាមគ្រោង​ប្រកួត​ពី​ថ្ងៃ​ទី២០ ខែ​វិច្ឆិកា ដល់​ថ្ងៃ​ទី​០៥ ខែ​ធ្នូ ឆ្នាំ​២០២១ តែ​ក្រោយពី​ត្រៀម​ប្រកួត​ស៊ី​ហ្គេមនៅ​វៀតណាម Johnny ក៏​ត្រៀមខ្លួន​រួចរាល់​ក្នុង​ការ​បន្ដ​ជួយ ​ក្រុម​ជម្រើស​ជាតិ​កីឡា​ទោចក្រយាន​កម្ពុជា ក្នុង​ការ​ប្រកួត​កីឡា​ស៊ី​ហ្គេមលើក​ទី​៣២ ឆ្នាំ​២០២៣ ដែល​កម្ពុជា​នឹង​ធ្វើ​ជា​ម្ចាស់ផ្ទះ​ផង​ដែរ៕

​អត្ថបទ៖ លី ឈុន​ឡា