កោះកុង៖ ពលរដ្ឋរស់នៅតាមតំបន់កោះមួយចំនួន ក្នុងខេត្តកោះកុង នៅថ្ងៃទី៤ ខែឧសភានេះ សម្រុកទៅចាក់វ៉ាក់សាំងកូវីដ-១៩ ដូសជំរុញ ខណៈគ្រូពេទ្យយកវ៉ាក់សាំងចាក់ដល់មូលដ្ឋាន។

ជាថ្មីម្តងទៀតលោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស និងលោកជំទាវវេជ្ជបណ្ឌិត លី អាយលែន តំណាងអង្គការសុខភាពពិភពលោកប្រចាំប្រទេសកម្ពុជា នៅព្រឹកថ្ងៃទី៤ខែឧសភានេះ បន្តដឹកនាំក្រុមការងារមន្រ្តីសុខាភិបាល និងអាជ្ញាធរមូលដ្ឋាន ចុះពិនិត្យ​ទីតាំងចាក់វ៉ាក់សាំងកូវីដ-១៩ នៅសាលារៀន មន្ទីរពេទ្យ និងទីប្រជុំជនផ្សេងៗមួយចំនួនទៀត។

ក្រៅពីនេះ លោកជំទាវទាំងពីរ និងក្រុមការងារចុះសួរសុខទុក្ខប្រជាពលរដ្ឋពីដំណើរ​ការ​ចាក់វ៉ាក់សាំង នៅភូមិកោះស្រឡៅ ស្រុកកោះកុង ខេត្តកោះកុង។

នៅក្នុងឱកាសនោះ លោកជំទាវវេជ្ជបណ្ឌិត ឱ វណ្ណឌីន បានមានប្រសាសន៍ថា ក្រោមកាណែនាំ​របស់​សម្តេចតេជោ ហ៊ុន សែន នាយករដ្ឋមន្រ្តីកម្ពុជា ​ការយកវ៉ាក់សាំងទៅចាក់នៅទីប្រជុំជន សាលារៀន និងរោងចក្រសហគ្រាសជាដើមនោះ ​បានជំរុញកំណើនអត្រាអ្នកចាក់វ៉ាក់សាំងកូដវីដ ដូសជំរុញ ​ឲ្យកាន់តែកើនឡើងខ្ពស់បន្ថែមទៀត ​ដើម្បីបង្កើនភាពសាំងក្នុងសហគមកាន់តែច្រើន​ថែមទៀត។

ក្រៅពីនេះ លោកជំទាវ​ បានជំរុញដល់ពលរដ្ឋមិនទាន់ទទួលបានការចាក់វ៉ាក់សាំងកូវីដ ជា​ពិសេសដូសជំរុញ ​សូមរួសរាន់ទៅទទួលការចាក់វ៉ាក់សាំងឱ្យបានគ្រប់ៗគ្នា។

ជាមួយគ្នានេះ ប្រជាពលរដ្ឋរស់នៅភូមិកោះស្រឡៅ ស្រុកកោះកុង ខេត្តកោះកុង ​បានឱ្យដឹងដែរថា បន្ទាប់​ពីគ្រូពេទ្យយកវ៉ាក់សាំងកូវីដ ​មកដល់មូលដ្ឋានភូមិ បង្ករលក្ខណៈងាយស្រួលច្រើន ជា​ពិសេសចំណេញពេលវេលាធ្វើដំណើរមកទីប្រជុំជន។ក្រៅពីនេះ ពួកគាត់អគុណ​ដល់​សម្តេចតេជោ ហ៊ុន សែន នាយករដ្ឋមន្រ្តីកម្ពុជា ដែលបានស្វះស្វែងរកវ៉ាក់សាំងចាក់ជូនប្រជាពលរដ្ឋពល។

ការចាក់វ៉ាក់សាំងកូវីដ-១៩ ស្រោចលើប្រជាពលរដ្ឋ ត្រូវបានរាជរដ្ឋាភិបាលកម្ពុជា​ ចាត់ទុក​ជា​យុទ្ធសាស្រ្ត​ចម្បងមួយ​ ដើម្បីទប់ស្កាត់ការរីករាលដាលជំងឺកូវីដ-១៩​ ខណៈបច្ចុប្បន្នប្រទេស​កម្ពុជា​បើក​ដំណើរសេដ្ឋកិច្ចធម្មតា ​ជាមួយវត្តមានជំងឺកូវីដ។

បច្ចុប្បន្នប្រទេសកម្ពុជាទទួលបានវ៉ាក់សាំង​កូវីដជាង ៥០លានដូស រាប់​បញ្ចូល​ទាំង​ការបញ្ជាទិញ​ពី​ប្រទេសចិន ជំនួយតាមរយៈយន្តការកូវ៉ាក់ ​និងបណ្តាប្រទេសផ្សេងៗ​មួយចំនួនទៀត សម្រាប់​ប្រើប្រាស់ក្នុងយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនពលរដ្ឋអាយុពី៣ឆ្នាំឡើង ចាប់ពីដូសទី១ឡើងទៅ៕ អត្ថបទ៖ទូច សោភ័ណ